هیلاری کلینتون و دونالد ترامپ سون دفعه اکران‌لاردا قارشی-قارشییا گلدی
هیلاری کلینتون و دونالد ترامپین موباحیثه‌یه ال وئرمدن باشلاماسی دقت چکدی
آمریکا 8 نوامبردا ائدیله‌جک باشقان‌لیق یاریشینا گون‌لر قالا ایکی نامیزد سون دفعه اکران‌لاردا قارشی-قارشییا گلدی.
لاس وگاس‌داکی نئوادا اونیورسیته‌سینده تشکیل ائدیلن اوچونجو موباحیثه‌ده، دموکرات پارتی نامیزدی هیلاری کلینتون ایله رقیبی جمهوریتچی پارتی نامیزدی دونالد ترامپ، چوخ آغیر بیر شکیلده موباحیثه ائتدی.
هیلاری کلینتون و دونالد ترامپین موباحیثه‌یه ال وئرمدن باشلاماسی دقت چکدی.
موذاکیره‌یه، آنکت‌لرده آچیق آرا قاباقدا اولماسی‌نین تاثیریله اولدوقجا راحت بیر شکیلده گلن کلینتونون، کورتاژ موذاکیره‌لری اثناسیندا گؤزلری دولدو.
نامیزدلر کورتاژ موضوعسوندا ایکی آیری قوطوبدایدی.
"من حیات‌دان یاناییم" دئین ترامپا جواب اولا‌راق کلینتون "قادین‌لار اؤز ساغلیق‌لاری ایله علاقه‌دار قرار وئره‌بیلمه‌لی" دئدی.
فردی سیلاحلانما موضوعسوندا ایسه، ایکی نامیزدین اولدوقجا یاخین فیکیرلره صاحب اولدوغو اورتایا چیخدی.
ایکی نامیزد ده فردی سیلاحلانمانین قاداغانلانماماسی لازیم اولدوغونو ایفاده ائدرکن، هیلاری کلینتون ضرر گؤرن اوشاق‌لاری و گوناه‌سیز اینسان‌لاری گؤز اؤنونه گتیره‌رک، بعضی محدودیت‌لر ائدیلمه‌سی لازیم اولدوغونو سؤیله‌دی.
سئچیم‌لره روسیانین تأثیری اولدوغونو ادعا ائدن دموکرات نامیزد، پوتین‌ین دونالد ترامپین دستکلدیگینی ادعا ائتدی.
ترامپ ایسه؛
"پوتین منیمله باغلی یاخشی شئی‌لر سؤیلمیش اولا بیلر. روسیا و آمریکا راضیلاشار و داعشین اوزرینه گئدرسه بو هر کس اوچون یاخشی اولار." دئدی.
نوکلئر سیلاح‌لاری ایستیفاده ائتمه مسئولیتی‌نین رقیبینه وئریله مه‌یه‌جگینی سؤیله‌ین هیلاری کلینتونا، دانالد ترامپ چوخ آغیر جواب وئردی.
ترامپ؛
"منیم سؤیله‌دیک‌لریم دگیشدیریلیر. کلینتونون یالانچی اولدوغو دفعه‌لرله ثبوت ائدیلدی. بو دا اونلاردان بیری." دئدی.
ایکی نامیزد ایقتیصاد موضوعسوندا دا فیکیر آیری‌لیغینا دوشدو.
ترامپ، اسکی باشقان بیل کلینتونون ایمضالادیغی NAFTA راضیلاشماسی‌نین اؤلکه تاریخین‌دکی ان پیس تیجارت راضیلاشما اولدوغونو ایفاده ائدرکن، هیلاری کلینتون ترامپین آمریکا‌لی‌لار یئرینه چینلیلره ایش وئرمکله گوناهلاندیردی.
کلینتونون تیجارت ناظیرلیگی آچیلاجاغینی وعد ائتمه‌سی اوزرینه ایسه ترامپ؛
"30 ایلدیر دولتین فرق‌لی آددیم‌لاریندا چالیشدینیز، نیه داها اوّل اولمادینیز؟" دئیه‌رک رقیبینی تنقید ائتدی.
دموکرات نامیزد، بؤیومگی اورتا صینیفله تامین ائدجگینی سؤیلیرکن، دونالد ترامپ ایقتیصاد سیاستینده آیرینتی‌لارا گیرمه‌دی.
سون 20 ایلده قوروملار وئرگی‌سی وئرمدیگینی اعتراف ائتمسیله بیرلیکده بؤیوک تنقیدلرین هدفی اولان دونالد ترامپ، وئرگی‌لری آزالداجاغینی ایفاده ائتدی.
کلینتونون دونالد ترامپا قادین‌لارا یؤنلیک رفتاری و تجاووز ادعا‌لاری ایله یوکلنمه‌سی اوزرینه، ترامپ سؤزو کلینتونون ایمیل ایسکاندالینا گتیردی.
ترامپ، کلینتونو، محکمه جلبی اولماسینا باخمایا‌راق 30 مین ایمیلی سیلمکله گوناهلاندیردی.
گؤچمن‌لر موضوعسوندا آغیر رفتارینی داوام ائتدیرن جمهوریتچی نامیزد، نارکوتیک قاچاقچی‌لیغی‌نین بؤیوک بیر پروبلم اولدوغونو و امنیتین آرتیریلماسی لازیم اولدوغونو ایفاده ائتدی.
کلینتون ایسه گوناهکارلار گؤندریلمه‌لی لاکین بوتونلوکله دئپورت ائتمه قراری اؤلکه‌نی بؤلر خبردارلیغینی ائتدی.
موباحیثه‌ده موصولو قورتارما عملیاتی دا گوندمه گلدی.
موصول عملیاتین بیر سئچیم سرمایه‌سی اولدوغونو ایفاده ائدن دونالد ترامپ، نتیجه اولا‌راق قازانان ایران اولا‌جاق دئدی.
هیل‌لاری کلینتون؛
"ترامپ، موتتفیکلریمیزین منی دستکلمک اوچون عملیات تشکیل ائتدیگینی ادعا ائدیر و بو چوخ کومیک بیر ادعا" دئدی.
ترامپ، سوریه‌ده اسد رژیمی دئوریلیرسه وضعیتین داها پیس اولاجاغینی ادعا ائدرکن، هیلاری کلینتون اوچوشا قاداغان بؤلگه و امنیتلی بؤلگه تطبیقینی دستکلیه‌جگینی سؤیله‌دی.
موستقیل سورغولارا گؤره سرعتله سس ایتیرن دونالد ترامپ، رقیبی هیلاری کلینتونون 10 بال گئریسینه دوشدو.
گاف‌لاری ایله میزاحچی‌لارین هدفی حالینا گلن دونالد ترامپین، اؤلکه‌نین ایلک قادین باشقان نامیزدی هیلاری کلینتونو کئچه بیلمه‌سی اوچون قرارسیز سئچیجی‌لر راضی ائتمه‌سی لازیم‌دیر.
ایلگیلی‌لی خبرلر
ایسپانیانین باش ناظیری ایستعفا وئرمه‌یه‌جگینی آچیقلاییب
ایسپانیانین باش ناظیری پدرو سانچز اؤز وظیفه‌سینده قالاجاغینی آچیقلاییب.
