ساواشا انگل اولماق اوچون سون شانس
"نتیجه‌یه چاتیب چاتمایاجاغی نامعلوم اولسا دا، سیناماغا دگر"
اوکراینانین دوغوسوندا 10 آیدا بئش مین 400دن چوخ انسانین اؤلدوگو چاتیشما‌لارا سون وئرمه چابالاری مونیخ گوونلیک کنفرانسیندا دا گوندمده.
موسکوادا روسیا دؤولت باشقانی ولادیمیر پوتین ایله گؤروشمه سونراسیندا مونیخه گئچن آلمانیا و فرانسا لیدئرلری بو قونودا اؤنم‌لی مئساژلار وئردی.
فرانسا پرزیدنتی فرانسوا اولاندا گؤره، باریش چاباسی، ساواشا انگل اولماق اوچون سون شانس.
آلمانیا باشباخانی آنگلا مرکل ده، اوکراینادا باریشین تامین ائدیلمه‌سی اوچون فرانسایلا باشلاتدیق‌لاری گیریشیمی نظرده توتا‌راق "نتیجه‌یه چاتیب چاتمایاجاغی نامعلوم اولسا دا، سیناماغا دگر" دئدی.
روسیا ایله اوزرینده ایشلمک اوزره اوزلاشما ساغلانان پلانا باغلی هر هانسی بیر آیرینتی وئریلمه‌دی، آنجاق سپتامبر آییندا بئلاروس‌دا ایمضا‌لانان آتیشکس آنلاشماسینی یئنیدن حیاتا گئچیرمه‌نین آماجلاندیغی بیلدیریلیر.
بو مدتده ناتونون یوکسک سویه‌لی حربی قوموتانین ائتدیگی "باتی اوکراینایا سلاح و حربی تجهیزات یاردیمی ائتمه سئچه‌نه‌گینی گؤزآردی ائتممه‌لی" آچیقلاماسینا دا مرکل‌دن جاواب گلدی.
آنگلا مرکل، اوکراینانی سیلاحلاندیرمانین پروبلئمی حل ائدجیینه اینانمادیغینی سؤیله‌دی.
روسیا طرفدارلاری ایله اوکراینا اوردوسو آراسیندا داوام ائدن چاتیشما‌لار، بؤلگه‌ده بیر میلیون 200 مین دولاییندا انسانی ائولرینی ترک ائتمک مجبوریتینده بوراخدی.
روسیا، اوکراینانین دوغوسوندا روسیا یان‌لی‌لارینا دستک وئرمکله سوچلانیر. آنجاق موسکوا بونو رد ائدیر.
