عرب بیرلیگین‌دن آمریکایا اعتراض
محمد صبیح، مطبوعاتا ائتدیگی آچیقلامادا، "آمریکانین، عباسین دانیشماسینا گؤستردیگی اعتراض‌دان اؤتری درین کدر ائشیتدیک" دئدی
عرب بیرلیگین‌دن آمریکایا اعتراض
عرب بیرلیگی، فیلیسطین دولت باشقانی محمود عباسین بیرلشمیش میللتلر عمومی قورولوندا ائتدیگی دانیشمانین آردین‌دان، آمریکا خاریجی ایشلر ناظیرلیگی ایسپیکری جن پساکی‌نین "خیال قیریق‌لیغی" آچیقلاماسینا اعتراض گؤستردی.
عرب بیرلیگی‌نین باش کاتیبی نبیل العربی‌نین فیلیسطین‌دن مسئول کؤمکچی‌سی محمد صبیح، مطبوعاتا ائتدیگی آچیقلامادا، "آمریکانین، عباسین دانیشماسینا گؤستردیگی اعتراض‌دان اؤتری درین کدر ائشیتدیک" دئدی.
آمریکادان، فیلیسطین مسئله‌سینده مؤوقئیینی نظردن کئچیرمه‌سینی ایسته‌ین صبیح، "حؤرمت‌لی عباس، باریش آدامی‌دیر، باریش و ایکی دولت‌لی حل‌دن بحث ائتمیش‌دیر. ایللرجه ایسراییل ایله مذاکیره‌لر ائتدی و بو سببله فیلیسطین ایچینده تنقیدلره معروض قالدی. بیرلشمیش میللتلر تشکیلاتی‌نا چیخیش ائتمک اوچون گئتدیگینده ده عرب باریش جهدینه سؤیکنن ایکی دولت‌لی حلّی ایضاح ائتمک اوچون الین‌دن گلنی ائتدی "دئیه دانیشدی.
مذاکیره‌لر زامانی یهودی مسکونلاشما واحیدلری‌نین آز قالا آلتی قات آرتدیغینا ایشاره ائدن صبیح، قودسده داغیتما و مسکونلاشما واحیدی تیکینتی‌سی سیاستی‌نین داوام ائتدیگینی، اوشاق‌لارین اؤلدورولدوگونو، غزه‌نین ایسه ایسراییلین تشکیل ائتدیگی اوچ داغیدیجی سالدیرییا معروض قالدیغینی بیلدیریب.
"بوتون بون‌لارا باخمایا‌راق، عباس مذاکیره‌لره گئتمکده ایصرارلی اولدو" دئین صبیح، عباسین، بمت-ده ائتدیگی دانیشما ایله بوتون فیلیسطین‌لی‌لرین و عرب‌لرین فیکیرینی دیله گتیردیگینی مدافعه ائتدی.
فیلیسطین دولت باشقانی عباس، جمعه گونو بمت عمومی قورولوندا ائتدیگی دانیشمادا، "ایسراییلین اؤزونو ساوونما حاقی وار دئین‌لر خالقیمیزدان وئریلن مین‌لرله قوربانا دگر وئرمیر. فیلیسطین خالقی‌نین جانی دا عینی دیگر اینسانلارینکی کیمی قیمت‌لی‌دیر. بونو خاطیرلاتماق ایستییرم. فیلیسطین خالقی آدین‌دان بونو سؤیلمک ایستییرم کی: اونوتمایاجاغیق، باغیشلامایاجاغی و ساواش گوناهکارلاری‌نین جزا‌سیز قالماسینا ایجازه ائتمه‌یه‌جگیک "ایفاده‌سینی ایستیفاده ائتمیشدی.
آمریکا خاریجی ایشلر ناظیرلیگی سوزجوسو جن پساکی ایسه عباسین آچیقلاما‌لارین‌دان کدر و ناراحات‌لیق دویدوق‌لارینی بیلدیرمیش، دانیشماغی "تجاووزکار و خیال قیریق‌لیغی" اولا‌راق دگرلندیرمیشدی.
