روسیادان ارمنیستانا قاراباغ جاوابی

روسییا دؤولت باشقانلیغی سارایی (کرملین) سؤزچوسو دمیتری پئسکوو، ارمنیستانین قاراباغ قونوسوندا روسیایا قارشی سوچلامالارینین دایاناقسیز اولدوغونو و آذربایجانین فعالیتلرینین اؤز (آذربایجان) تورپاقلاریندا اولدوغونو سؤیله‌دی.
پئسکوو، باشکند موسکوادا ژورنالیستلره آذربایجان اوردوسونون قاراباغ‌داکی لوکال آنتی‌ترور فعالیتلرینی دگرلندیردی.
قاراباغ قونوسوندا روسیا، آذربایجان و ارمنیستان آراسینداکی ۲۰۲۱-۲۰۲۲ تاریخلی اوچلو آنلاشمالاری دقته آلدیقلارینا ایشاره ائد‌ن پئسکوو،
"بو آندا آرشیولر باخیمیندان اؤنملی بیر باشقا خصوص دا ارمنیستان باشباخانی نیکول پاشینیانین آذربایجانین ۱۹۹۱ اعتیبارییلا اولان تورپاقلارینی تانیماسیدیر. بو، ارمنی طرفینین قاراباغی آذربایجان تورپاقلارینین آیریلماز بیر پارچاسی اولاراق تانیدیغی معناسینی وئریر" دئیه دانیشدی.
پئسکوو، بونون آنلاشمالارداکی بعضی حؤکملری اؤنملی اؤلچوده دییشدیردیگینی وورغولایاراق،
"اؤزللیکله ارمنی طرفینین قاراباغی آذربایجانین بیر پارچاسی اولاراق تانیما یولونداکی رسمی قراریندان سونرا، بیزه قارشی بو جور مذمتلری قبول ائتمیریک. بیزه یؤنه‌لدیله‌ن بو جور سوچلامالار کسینلیکله اساسسیز و دایاناقسیزدیر. حقوقی باخیمدان آذربایجانین اؤز تورپاقلارین‌داکی ائیلملری سؤز قونوسودور" ایفاده‌لرینی ایشلتدی.
۴۴ گونلوک ۲.جی قاراباغ ساواشی (۲۰۲۰) سونراسی، آذربایجانین قاراباغ بؤلگه‌سینده‌کی سؤزده رژیمین آتدیغی آددیملار گرگینلیگین یوکسله‌مه‌سینه سبب اولدو.
سؤزده رژیم، کنترلونداکی تورپاقلاردا، آذربایجان اوردوسونون مؤوضعلرینه یاخینلاشماق، اؤز مؤوضعلرینی گوجله‌ندیرمک اوچون خندک قازما، فرقلی استحکام فعالیتلری و تخریبات گیریشیملری کیمی بیر سیلسیله تخریبات‌ گئرچکلشدیردی.
ارمنی سلاحلی قروپلار، سون بیر نئچه آیدا آذربایجان اوردوسونون مؤوضعلرینه سیستماتیک شکیلده آتیش ائتمه‌یه و اراضیلره مین دؤشه‌مه‌یه داوام ائتدی.
آذربایجانین سؤزده رژیمین لغو ائدیلمه‌سی طلبلرینه باخمایاراق ارمنی گوجلرینین کنترلونداکی تورپاقلاردا، ۹ سپتامبردا سؤزده "جمهورباشقانی سئچیمی" ائدیلمه‌سی ایسه گرگینلیگی داها دا یوکسلتدی.
سون اولاراق خوجاوند ائلی احمدبی‌لی-فضولی-شوشا قورو یولون‌دا آذربایجان دؤولت قورومونا عاید کامیونو مینه چیخدی و ۲ نفر حیاتینی ایتیردی.
حادثه یئرینه گئدن پلیس آراجینین باشقا بیر مینه چیخماسی نتیجه‌سینده ده ۴ پلیس شهید اولدو.
بونون اوزرینه آذربایجان ساوونما باخانلیغی، قاراباغ‌دا آنایاسال قورولوشو یئنیدن تاسیس ائتمک آماجی ایله یئرلی آنتی‌ترور تدبیرلری باشلادیلدیغینی بیلدیردی.
آذربایجانین طلبلری ایستیقامتینده قاراباغ‌داکی ارمنی سلاحلی گوجلر بو گون سلاح بوراخماغی و بؤلگه‌نین سیلاحسیزلاندیریلماسینی قبول ائتدی.
آذربایجان ساوونما باخانلیغی دا بونون اوزرینه آنتی‌ترور عملیاتینین دوردورولدوغونو آچیقلادی.