کیئوه ائندیریلن ضربه لر نتیجه‌سینده 1 نفر اؤلوب، 4 نفر یارالانیب

روسیا هاوا قوه‌لری‌نین اوکراینانین پایتاختی کیئوه ائندیردیگی ضربه‌لر نتیجه‌سینده 1 نفر اؤلوب، 4 نفر یارالانیب.

کیئو سون گونده اوچونجو دفعه پیلوت‌سوز اوچوش آپارات‌لاری‌نین (پهپاد) هوجوم‌لاری‌نین هدفینه چئوریلیب. هوجوم‌لاردا ان آزی 1 نفر اؤلوب، 4 نفر یارالانیب.

هوجومدا اینسان‌لار تشویش ایچینده مترو ایستگاه لارینا و سیغینا‌جاق‌لارا آخیشیب‌لار. بیلدیریلیب کی، 20-دن چوخ پهپاد هاوا هوجومون‌دان ساوونما سیستم‌لری ایله ضررسیزلشدیریلیب.

اوکراینا اوردوسون‌دان دونن (29 می) وئریلن آچیقلامادا روسیانین کیئوی هدف آلان 11 "ایسکندر" راکتی آتدیغی، راکئت‌لرین هامیسی‌نین هاوادا محو ائدیلدیگی آچیقلانیب.

روسیانین بازار گونو گئجه 54 پهپاد ایله کیئوی هدف آلدیغی و اونلاردان 52-نین ضررسیزلشدیریلدیگی بیلدیریلیب.

روسیانین پایتاختی مسکوا دا درون هوجوم‌لاری‌نین هدفی اولوب.

دوشن پهپادلارین بعضی بینا‌لارا جزعی زیان ووردوغو، 1 نفرین یونگول خسارت آلدیغی آچیقلانیب.

روسیا ساوونما ناظیرلیگی اوکراینا اوردوسونون هاوا بازا‌لاری‌نین اوزاق منزیل‌لی دقیق ایداره اولونان راکت‌لرله وورولدوغونو آچیقلاییب.

اوکراینا اوردوسون‌دان وئریلن آچیقلامادا اودسا لیمان شهرینه هوجومدا 5 اوچاغین خیدمت‌دن چیخدیغی بیلدیریلیب.

روسیانین 24 فوریه 2022-جی ایلده باشلادیغی و 15 آیدان آرتیق‌دیر داوام ائتدیگی محاربه‌ده زاپویژیا، خارکوو، لوگانسک و خرسون کیمی بؤلگه‌لرده جبهه خطینده قارشیدورما‌لار داوام ائدرکن، خصوصیله سون 8 آیدا ان شدت‌لی قارشیدورما‌لارین یاشاندیغی بؤلگه دونتسک اولوب.

اوکراینانین دونتسک ویلایتینده باخموت جبهه‌سی ایستیقامتینده یئرلش‌دیریلن اوکراینا اوردوسونون توپچولاری روسیا موضع لرینی شدتله آتشه توتور.

دیگر طرف‌دن، امریکالی سناتور لیندسی گراهامین اوکراینایا سفری و وئردیگی آچیقلاما‌لاردان سونرا روسیا گراهامین آدینی آختاریشدا اولان‌لار سیاهی‌سینا علاوه ائدیب.

خاطیرلاداق کی، امریکا-لی سناتور اوکراینا پرزیدنتی ولودومیر زلنسکی ایله گؤروشونده روسیانین موناقیشه‌ده حربی ایتکی‌لرینی امریکانین ان یاخشی خرج‌لریندن بیری کیمی قیمتلندیریب.