خامنه ای قیزلارین مکتب‌لرده زهرلنمه حال‌لاری ایله علاقه‌دار گؤستریش وئریب

ایران ایسلام جمهوریتی‌نین عالی رهبری آیت الله علی خامنه ای بیر چوخ شهرلرده قیزلارین تحصیل آلدیغی مکتب‌لرده باش وئرن زهرلنمه حال‌لاری ایله باغلی اولا‌راق یئتکیلیلره "حادثه‌نی جدی قبول ائتمگی و گوناهکارلاری ان آغیر شکیلده جزالاندیرماغی" تاپشیریب.

خامنه ای "آغاج اکمه گونو" موناسیبتی ایله ائتدیگی مراجعتده بوتون اؤلکه‌ده ناراحات‌لیق دوغوران قیز اؤیرنجی لرین  تحصیل آلدیغی مکتب‌لرده باش وئرن زهرلنمه حال‌لارینا توخونوب.

ایشین ایچینده جینایت شبکه‌سی و یا تشکیلاتی بیر یاپی‌نین اولا بیله جگینه ایشاره ائدن خامنه ای جمعیتده تشویش و قورخویا سبب اولان بو جینایته گؤز یومولا بیلمه‌یه‌جگینی بیلدیریب.

بونون جمعیتین ان گوناه‌سیز حیسه‌سینه، یعنی اوشاق‌لارا قارشی تؤردیلدیگی اوچون "بؤیوک جینایت" اولدوغونو وورغولایان خامنه ای دئییب:

"کشفیات و تهلوکه‌سیزلیک قوه‌لری حادثه‌نین اساس عامل‌لرینی معینلشدیرمه‌لی‌دیر. حادثه‌نی تؤره‌دن‌لر، جینایتکارلار محاکیمه اولونما‌لی و ان آغیر جزا‌لارلا جزالاندیریلما‌لی‌دیر. اونلارا یازیغی گلمه‌مه‌لی، جزا‌لاری نمونه وی اولما‌لی‌دیر".

قضائیه قوه سینین باشچی‌سی غلام حسین اژه ای ده بیلدیریب کی، قیز اؤیرنجی لرین تحصیل آلدیغی مکتب‌لرده باش وئرن زهرلنمه حال‌لاری ایله باغلی معین ائدیله‌جک گوناهکارلار "دونیادا فتنه-فساد تؤرتمک" جینایتینی تؤرتمک‌دن "اعدام"لا محاکیمه اولونا‌جاق‌لار.

خاطیرلاداق کی، ایران-دا 2022-جی ایل نوامبرین 30-دان اعتباراً مکتب‌لرده کوتلوی زهرلنمه حال‌لاری دقت چکیر.

سببی هله دقیق آچیقلانمایان زهرلنمه حال‌لاری ایله باغلی رسمی‌لر "مکتب‌لرده ایستیفاده ائدیلن زهرین ترکیبینده ن2 (دیازوت) گازینین اولدوغو معین ائدیلیب" دئیه آچیقلاما وئریب.

رژیم علیهدارلاری‌نین ادعا‌لارینا گؤره، ایران رهبرلیگی داخیلینده قادین‌لارین رهبرلیک ائتدیگی مهسا امینی نوماییش‌لری‌نین قیساسینی آلماق ایسته‌ین بعضی رادیکال قروپ‌لار وار.

تهران رهبرلگینه یاخین منبع‌لر ایسه، حادثه‌نین آرخاسیندا خالقی رهبرلیگه قارشی قیزیش‌دیرماق مقصدی داشییان رژیم علیهداری عنصورلارین دایاندیغینی ادعا ائدیر.