گوترش اوکراینادا: سوچلارین ان پیسی ساواشین اؤزودور

بیرلشمیش میللتلر باش کاتیبی آنتونیو گوترش، گئتدیگی اوکراینادا یئنیدن کنترلون تامین ائدیلدیگی بورودیانکا، بوچا و ایرپین شهرلرینی گزدی.

گوترش، بورودیانکادا ساواش سببیله خارابایا دؤنن محله‌لرده گزدیکدن سونرا وئردیگی آچیقلامادا،

"عائله‌می او خاراب و قرالمیش ائولردن بیرینده خیال ائدیره‌م. نوه‌لریمین قورخو ایچینده قاچدیغینی گؤروره‌م. عائله‌دن بیری اؤلدو. ۲۱.جی عصرده ساواش آنلامسیزدیر، ساواش وحشتدیر. ۲۱.جی یوزایلده ساواش قبول ائدیله‌بیلمز" ایفاده‌سینی ایشلتدی.

بوچایا سفرده ایسه اولوسلارآراسی جزا محکمه‌سی ساوچیلارینین بورادا اولماسیندان و یاشانانلارین آراشدیریلماسیندان ممنونیت دویدوغونو ایفاده ائتدی.

گوترش، اولوسلارآراسی جزا محکمه‌سینین ایشلرینی دستکلدیگینی وورغولایاراق روسیایا دا محکمه ایله امکداشلیق ائتمه چاغریسی ائتدی.

ساواش سوچلارینا دا توخونان گوترش،

"اونوتمایاق کی سوچلارین ان پیسی ساواشین اؤزودور" دئدی.

باش کاتیب، گئتدیگی ایرپین‌ده ایسه،

"وطنداشلار هر زامان ان یوکسک بدلی اؤده‌ییر. بو بینالاردا سوچسوز وطنداشلار یاشاییردی. هئچ ایشتیراک ائتمدیکلری بیر ساواش اوچون ان یوکسک بدلی اؤد‌دیلر. هارادا بیر ساواش وارسا ان یوکسک بدلی وطنداشلار اؤدییر" دئیه دانیشدی.

باشکند کیئو یاخینلارینداکی بوچا شهرینی روس گوجلرین‌دن ۱ آوریل‌ده قورتاران اوکراینا اوردوسو، بینالاری ییخیلمیش، کوچه‌لری جسد دولو بیر شهرله قارشیلاشمیشدی. کیئو یاخینلاریندا قورتاریلان یئرلشیم یئرلرینده ۴۱۰ وطنداشین جسدی تاپیلمیشدی.

روس عسگرلری ۲۴ فوریه‌ده اوکراینایا سالدیری باشلاتمیشدی.