زلنسکی: تخمیناً ۱۲۰ مین وطنداش ماریوپول‌دا محاصره آلتیندا

اوکراینا دؤولت باشقانی زلنسکی، روس گوجلرینین اله گئچردیکلری تورپاقلاردان تخمیناً ۵۰۰ مین اوکراینالینین روسیایا چیخاریلدیغینی سؤیله‌دی.

ولودیمیر زلنسکی، پرتغال پارلمانینا ویدئو کنفرانس یولویلا خطابیندا،

"روس ایشغالچیلار ایشغال ائتدیکلری تورپاقلاردان داها ایندیدن ان آز ۵۰۰ مین وطنداشیمیزی (روسیایا) چیخاردی. بو تهجیردیر، گئچمیشین ان قورخونج توتالیتار رژیملرینین ائتدیگی بودور" ایفاده‌سینی ایشلتدی.

سینیردیشی ائدیله‌ن اوکراینالیلارین سندلرینه ال قویولدوغونو و ارتباطدان محروم بوراخیلدیغینی ایفاده ائد‌ن زلنسکی، "وطنداشلاریمیز، روسیانین اوزاق بؤلگه‌لرینه گؤندریلیر" دئدی.

ولودیمیر زلنسکی، ۵۷ گونلوک تام بیر ساواشدا روسیا طرفیندن اله گئچریله‌ن تخمیناً ۱۰۰۰ یئرلشیم یئرینی قورتاردیقلارینی آنجاق هله ایشغال ائدیله‌ن شهر و یئرلشیم یئرلرینین داها چوخ اولدوغونو وورغولادی.

اوکراینا لیدئری، 

"لئوپارد تانکلاری، زره‌لی ماشینلار، گمی‌سووار موشکلری بونلار سیزین صاحب اولدوغونوز و آوروپانین اؤزگورلوگونو قوروماغا کؤمکچی اولابیله‌جگینیز شئیلر. بو سببله بو کؤمگی بیزه تامین ائتمک اوچون اؤلکه‌نیزه مراجعت ائدیره‌م" دئیه دانیشدی.

زلنسکی، ماریوپول‌دا اوکراینالی عسگرلرین یانیندا، چوخو قادین و اوشاقلاردان اولوشان ۱۲۰ مین وطنداشین محاصره آلتیندا اولدوغونو دا سؤیله‌دی.

اوکراینا دؤولت باشقانی زلنسکی، اسپانیا و دانمارک باشباخانلاری ایله گرچکلشدیردیگی گؤروشمه‌نین آردیندان تشکیل ائدیله‌ن مطبوعات کنفرانسیندا، اؤنوموزده‌کی مدتین اؤلکه‌سینین دوغوسو اوچون چتین اولاجاغینی سؤیله‌دی.

زلنسکی، "عسگرلریمیزین یانین‌دا وطنداشلاریمیز دا وار. بونلارین چوخو قادین و اوشاقلار. تخمیناً ۱۲۰ مین وطنداش ماریوپول‌دا محاصره آلتین‌دا" ایفاده‌لرینی ایستیفاده ائتدی.

ماریوپول‌داکی آزووستال فابریکاسیندا تخمیناً ۴۰۰ یارالی اوکراینا عسگرینین اولدوغونو دا بیلدیر‌ن زلنسکی، سؤز قونوسو عسگرلرین موبادیله یولویلا قایتاریلماسی اوچون قارشی طرفه تکلیف‌ وئردیکلرینی ایفاده ائتدی.