بلینکن: روسیا ساواش سوچو ایشله‌ییر

آمریکا بیرلشمیش دؤولتلری خاریجی ایشلر باخانی آنتونی بلینکن، روس گوجلرینین اوکراینادا "ساواش سوچلاری" ایشله‌دیگی نتیجه‌سینه چاتدیقلارینی آچیقلادی.

بلینکن، اوکرایناداکی ساواشدا میدانا گلن وطنداش ایتکینلری و روسیانین سالدیریلارییلا باغلی یازیلی آچیقلاما وئردی.

باشیندان بری روسیانین اوکراینادا وطنداشلاری هدف آلان سالدیریلارینی ایزله‌ییب بونلاری سندلری ایله ثبت ائتمه‌یه چالیشدیقلارینی ایفاده ائتدی.

باخان بلینکن، اوکراینانین ماریوپول شهرینده‌کی خسته‌خانا و تاتر بینالارینین وورولماسینی اؤرنک گؤستره‌رک،

"(روسیا دؤولت باشقانی ولادیمیر) پوتینین گوجلری بو تاکتیکلردن، خالقین دیرنیشینی قیرماق اوچون بومباردمانلاری آرتیردیقلاری گروزنی (چچنیستان)و حلب‌ده (سوریه) ده ایستیفاده ائتمیشدی" دئیه بیلدیردی.

اوکراینانین فرقلی بؤلگه‌لرینده وطنداشلاری و وطنداش یاشام ساحه‌لرینی هدف آلان چوخ ساییدا روس سالدیریسینین توپلوما آچیق یا دا استخبارات قایناقلاریندان دقتلی شکیلده آراشدیریلاراق سندلشدیریلدیگینی ایفاده ائد‌ن بلینکن،

"گئچه‌ن هفته آمریکا‌لی متخصصلرین اوکرایناداکی پتانسیل ساواش سوچلارینی سندلشدیرمک اوزره چالیشدیقلارینی سؤیله‌میشدیم. بو گون الیمیزده‌کی مؤوجود معلوماتلار ایشیغیندا آمریکا رهبرلیگینین، روس گوجلرینین اوکراینادا ساواش سوچلاری ایشله‌دیگی دگرلندیرمه‌سینه چاتدیغینی آچیقلاییرام" ایفاده‌لرینی ایشلتدی.

بلینکن آیریجا، ساواش سوچلارینی ایشله‌یه‌نلرین حساب وئرمه‌سینی تامین ائتمک اوزره لازیم اولان آددیملاری آتاجاقلارینی دا سؤزلرینه علاوه ائتدی.

آمریکا باشقانی جو بایدن، گئچه‌ن هفته‌کی بیر آچیقلاماسیندا، "پوتینین ساواش سوچلوسو" اولدوغونو ساوونموش، بلینکن ده بو آچیقلاماسی ایله تامامی ایله قاتیلدیغینی دیله گتیرمیشدی.

موسکوا رهبرلیگی ایسه اوکراینادا وطنداشلاری هدف آلدیقلاری ادعالارینین اساسسیز اولدوغونو ساوونموشدو.