پاکیستانین سفیری: "تورکیه-نین آرابولوجو رولونو ممنونیت حیسی ایله قارشیلایاجاغیق"
پاکیستانین آنکارا‌داکی سفیری سجاد قاضی دوست و قارداش اؤلکه اولا‌راق گؤردوک‌لری تورکیه-نین پاکیستان و هیندیستان آراسینداکی بحرانین حلینده آرابولوجولوق رولونو ممنونیت حیسی ایله قارشیلایا‌جاق‌لارینی بیلدیردی.
پاکیستانین آنکارا‌داکی سفیری سجاد قاضی دوست و قارداش اؤلکه اولا‌راق گؤردوک‌لری تورکیه-نین پاکیستان و هیندیستان آراسینداکی بحرانین حلینده آرابولوجولوق رولونو ممنونیت حیسی ایله قارشیلایا‌جاق‌لارینی بیلدیردی.
پاکیستانین آنکارا‌داکی سفیری بونو اؤلکه‌سی ایله هیندیستان آراسیندا جامو کشمیرده تؤره‌دیلن بومبا‌لی هوجوم سببیندن یارانان و ایکی هفته‌دیر داوام ائدن، ساواش اوچاق لارینین وورولماسی ایله داها دا شدت‌لنن گرگین‌لیکله باغلی آنادولو خبر آژانسینا وئردیگی موصاحیبه زامانی بیلدیردی.
سفیر تورکیه-نین پاکیستان و هیندیستان آراسینداکی گرگینلیگین آزالدیلماسیندا اوینایا بیله جگی رولو دیرلندیره‌رک: "تورکیه پاکیستان اوچون بؤیوک بیر دوست و قارداش اؤلکه‌دیر. تورکیه دونیا میقیاسیندا خصوصی چکی‌سی اولان بیر اؤلکه‌دیر. تورکیه-نین یالنیز موجود گرگین‌لیگی آرا‌دان قال‌دیرماق اوچون دئییل، عینی زاماندا، پاکیستان و هیندیستانین گونئی آسیایا تأثیر ائدن آنا مسئله‌سی اولان کشمیرله باغلی دانیشیق‌لارا باشلاما‌لارینی دا تشویق ائده‌رک بؤلگه‌یه داوام‌لی باریش و ثابیتلیگین گلمه‌سینه یاردیم ائتمه مسئله سینده آرابولوجولوق تکلیف‌لرینی ده ممنونیتله قارشیلاییریق" دئدی.
پاکیستانین باش ناظیری عمران خانین طرف‌لرین دانیشیق‌لار یولو ایله گرگین‌لیگی آرا‌دان قالدیرماسی‌نین طرفداری اولدوغونا دا دقت چکن قاضی: "عکس تقدیرده وضعیت نظارت‌دن چیخا‌جاق و ایکی اؤلکه آراسینداکی هر هانسی بیر سهو حسابلاما بؤلگه‌یه باها باشا گله‌جک" دئدی.
قئید ائتمک لازیم‌دیر کی، هیندیستان و پاکیستان آراسینداکی سون گرگین‌لیک فوریه آیی‌نین 14-ده کشمیرین هیندیستانین نظارتی آلتیندا اولان حیسه‌سینده یارانیب. پولیس تشکیلاتینا تابع اولان میلیسه قارشی تؤره‌دیلن بومبا‌لی هوجومدا 44 نفر هلاک اولوب.
یئنی دهلی رهبرلیگی پاکیستانی هوجومو تشکیل ائدن تروریستلره هاوادارلیق ائتمکده گوناهلاندیریب. پاکیستان هوجومو قیناییب و عنوانینا سویله نن اتهامی رد ائدیب.
هیندیستان فوریه نین 26-دا کشمیر نظارت خطی‌نین پاکیستاندا یئرلشن ترور تشکیلاتی هدف‌لرینه هاوا هوجومو تشکیل ائتدیگینی بیلدیریب.
پاکیستان دا اؤلکه‌نین هاوا مکانینی پوزدوق‌لارینی سبب گؤستره‌رک هیندیستانین ایکی ساواش اوچاغینی ووردوغونو آچیقلاییب.
هیندیستان دا پاکیستانا عاید بیر ساواش اوچاغینی ووردوغونو آچیقلاییب، لاکین اسلام آباد رهبرلیگی بونو تصدیقلمه‌ییب.
پاکیستان حکومتی و اردوسو گرگینلیگین شدت‌لنمه‌سینی ایسته‌مه‌دیک‌لرینی وورغولاییب.
هیندیستانین باش ناظیری نارندرا مودی ایسه پاکیستانی اؤلکه‌سی‌نین ثابت‌لیگینی پوزماغا جهد گؤسترمکده اتهام ائدیب.
تورکیه، آوروپا بیرلیگی، آلمانیا، اینگیلتره، چین و روسیا طرف‌لری تمکین‌لی اولماغا چاغیریب‌لار.
