ایران، آمریکالی اسکی عسگری توتوقلادی
وایتین ایرانلی قیز دوستونو گؤرمک اوچون گئتدیگی بو اؤلکهده توتوقلاندیغینی بیلدیریلمیشدی
ایران خاریجی ایشلر باخانلیغی سؤزچوسو بهرام قاسمی، آمریکا دونانماسینین اسکی منسوبو مایکل وایتین مشهد شهرینده توتوقلاندیغینی دوغرولادی.
قاسمی، خاریجی ایشلر باخانلیغینین رسمی سایتیندا یئر آلان یازیلی آچیقلاماسیندا، مایکل وایتین بیر مدت اؤنجه، اولکهنین دوغوسونداکی خراسان رضوی ایالتینین مرکزی مشهد شهرینده توتوقلاندیغینی و بونون، باشکند تهرانداکی آمریکانین چیخارلارینی قوروما افیسینه بیلدیریلدیگینی قید ائتدی.
خاریجی ایشلر باخانلیغی سؤزچوسو قاسمی، وایتا حبسخانادا پسیکولوژیک شدت اویقولاندیغینا دایر ادعالاری رد ائتدی.
وایتین پروندهسینین محکمه اورگانلاری طرفیندن تحلیل اولوندوغونو بیلدیرهن قاسمی، تاماملاندیقدا صلاحیتلی اورگانلار طرفیندن لازیم اولان آچیقلامالارین ائدیلهجگینی قید ائتدی.
آمریکانین نیویورک تایمز قزئتی دونن آمریکا دونانماسینین اسکی بیر منسوبو اولان ۴۶ یاشلی مایکل وایتین، ژوئیه ۲۰۱۸دن بو یانا ایراندا حبسده اولدوغونو یازمیشدی.
نیویورک تایمز، اسکی عسگرین عائلهسینه دایاندیردیغی خبرینده، اصلیتی کالیفورنیالی اولان وایتین ایرانلی قیز دوستونو گؤرمک اوچون گئتدیگی بو اؤلکهده توتوقلاندیغینی بیلدیریلمیشدی.
آنا جوآن وایت، اوغلونون ۲۷ ژوئیه ۲۰۱۸ده دوبی اوزریندن آمریکایا دؤنوش اوچاغی اولدوغونو آنجاق بو اوچاغا هئچ مینمهدیگینی، بونون اوزرینه ایتکین بیلدیریشی وئردیکلرینی سؤیلمیشدی.
آمریکا پرزیدنتی دونالد ترامپین، می آییندا ایران ایله نوکلئر آنلاشمادان تک طرفلی اولاراق چکیلمهسینین آردیندان، ایرانا قارشی تحریملر یئنیدن اویقولامایا قویولموش و ایکی اؤلکه آراسینداکی گرگینلیک آرتمیشدی.
آمریکا خاریجی ایشلر باخانی مایک پومپئو، ایرانلا یئنی بیر آنلاشما ائدیلمهسی لازیم اولدوغونو وورغولایاراق ۱۲ مادهلیک شرط اورتایا آتمیشدی.
پومپئو، بو شرطلردن بیرینی، "ایران، گرچک اولمایان اتهاملارلا توتوقلادیغی بوتون آمریکا و بو اؤلکهنین اورتاق و متفیقی اولان اؤلکهلرین وطنداشلارینی سربست بوراخمالی" شکلینده آچیقلامیشدی.
ایراندا هله ده، وایتدان باشقا، ان آز ۳ آمریکا وطنداشینین داها ایللردیر توتوقلو اولدوغو ایفاده ائدیلیر.
ایلگیلیلی خبرلر
حوثی لر:"ایسراییل گمیسینی ووردوق"
یمن-دهکی حوثی لر عدن کؤرفزینده ایسراییل گمیسینی ووردوقلارینی بیلدیریبلر.