آمریکا ترور هؤرگوتونه 50 تن مهمات گؤندردی

آمریکا، بؤلوجو ترور هؤرگوتو پ‌کاکانین سوریه‌ده‌کی قولو پ.ی.د‌نین سلاح‌لی قانادی ی.پ.گ‌یه 50 تن مهمات گؤندردی.
آمریکا اوردوسونا عاید ج-17 یوک اوچاق‌لاری، 112 پاکت‌دن اولوشان 50 تن مهماتی، ی.پ.گ‌نین ایداره‌سینده اولان حسکه بؤلگه‌سینه بوراخدی.
واشینگتون رهبرلیگی‌نین، سوریه‌لی مخالیف‌لره قارشی ائگیت-دونات پروگرامینی گئچن هفته آسقییا آلماسی‌نین آردین‌دان، سوریه‌لی کوردلر ایله بعضی عرب و سورانی قروپ‌لارین "سوریه دموکراتیک گوج‌لری" آدی آلتیندا یئنی بیر سلاح‌لی اتفاق قوردوغو دا اورتایا چیخدی.
آمریکا حربی قایناق‌لاری، 5 مین نفرلیک گوجو اولان قروپا پاکت‌لر حالیندا 50 تن سورسات بوراخیلدیغینی دوغرولادی.
اولوسلارآراسی عفو هؤرگوتو ایسه، ی.پ.گ‌نین، رقه و حسکه‌ده، ائولرینی داغیتدیغی کورد اولمایان وطنداش‌لاری بؤلگه‌نی ترک ائتمه مجبور ائدرک ساواش سوچو ایشلدیگینی آچیقلادی.
هؤرگوت، "گئده‌جک یئریمیز یوخ" باشلیغییلا یاییملادیغی راپوردا، پ.ی.دنین، عرب و تورکمن کندلرینی اودا وئردیگینی، کندلی‌لری ده بؤلگه‌دن آیریلما‌لاری اوچون اؤلومله تهدید ائتدیگینی وورغولادی.
راپوردا دلیل اولا‌راق سونولان پیک گؤرونتو‌لری ده، حسینییه بؤلگه‌سینده گئچن ایل 225 اولان بینا ساییسی‌نین بو ایل 14ه دوشدوگونو دوغرولاییر.
کوبانی‌ده ده، کورد گوج‌لر، آمریکا‌لی‌لارین اؤزلرینه 120 تن سلاح و سورسات چاتدیردیغینی آچیقلادی.
کورد گوج‌لر، بیر نئچه هفته ایچینده، رقه‌نی داعش‌دن گئری آلماق اوچون هوجوما گئچه‌جک‌لرینی بیلدیردی.
دمشقده ایسه، خالقین، هاوا سالدیریلارینا دستک اوچون روسیا ائلچیلیگی قارشی‌سیندا توپلاندیغی سیرادا، بینایا 2 راکت آتیلدی.
ائلچیلیک، حادثه‌ده اؤلن یا دا یارا‌لانان اولمادیغینی بیلدیردی.
نوسرا جبهه‌سی ده، روسیانی گئنیش سالدیری ایله تهدید ائتدی.