اردوغان اسرائیل رهبریتی نینگ فلسطین خلقی نی قیرغین قیلیاتگن لیگینی بیلدیردی

تورکیه جمهوریتی جمهوررئیسی رجب طیب اردوغان, فلسطین دولت رهبری محمود عباس بیلن یککه مه یککه اوچره شیشی آرتیدن ترتیب لنگن اورتاق مطبوعاتی کنفرانسده گپیردی. 

محمود عباس و هیئتی نی تورکیه ده کوتیب آلگن لیک لری اوچون جوده خرسند بولگن لیگینی بیلدیرگن اردوغان, تورکیه و تورک خلقی نینگ هردایم فلسطین دعواسی نی حمایت قیلیب کیلیاتگن لیگینی معلوم قیلرایکن, کونگیللریده فلسطین نینگ اوزی گه خاص بیر اورین گه ایگه ایکن لیگینی ایسله تیب اوتدی. 

اردوغان, "صحبتی میزده فلسطین ده گی سونگّی وضعیت نی کینگ کولملی اوله راق بهالنتیردیک.  فلسطینلیک قرداش لری میز تاریخ لری نینگ اینگ یمان کون لریده یشه ماقده.  7- اوکتوبر دن بیری غزه و رام الله ده معصوم انسان لر گه قرشی اسرائیل تامانیدن اویوشتیریلگن هجوملرده 32 مینگ گه یقین فلسطینلیک شهید بولدی.  72 مینگ دن آرتیق کیشی یره لندی, 2 میلیون گه یقین فلسطینلیک اوی لرینی ترک ایتیش گه مجبور بولیب قالدی.  2,3 میلیون فلسطینلیک کونده لیک اولیه ضرورت لرینی تامین ایته آلمه یدی.  اسرائیل, غزه خلقی نی فقط گینه آچلیک و سووسیزلیککه محکوم ایتیب ایمس, عینی دمده معصوم انسان لرنی بمباران قیلیب هم وحشیانه بیر شکلده اولدیرماقده.  151 کوندن بیری سونگّی عصر نینگ اینگ کتته وحشت لری دن بیری گه شاهد بولماقده میز.  غربی کوچلرنینگ هم چیکسیز حمایتی بیلن نتنیاهو و رحم سیز رهبریتی, فلسطین خلقی نی انیق روشده قیرغین قیلماقده" دییه قید ایتدی. 

فلسطین دن کیلگن تقریباً 1000 زخمی نینگ تداوی سی نینگ تورکیه ده فرقلی کسلخانه لرده دوام ایتیاتگن لیگینی معلوم قیلگن اردوغان, اوز سوز لرینی, "نتنیاهو و جنایت اورتاق لری, توککن هر بیر تامچی قان نینگ حسابی نی حقوق و وجدان آلدیده مطلق صورتده بیره دی" شکلیده دوام ایتدیردی. 

مهمان دولت رهبری عباس ایسه, "تورکیه, قرداشلیککه اساساً فلسطین خلقی گه قرشی تاریخی مسئولیت لرینی اینگ یخشی بیر شکلده بجا کیلتیرماقده. (تورکیه نینگ) فلسطین دعواسی نی دواملی روشده حمایت قیلیاتگن لیگی اوچون منتدارمیز" دییه قید ایتدی.