تورکیه ده گی پارلمان سیلاوی اوز نهایه سیگه ایتدی

تورکیه ده گی پارلمان سیلاوی اوز نهایه سیگه ایتدی
تورکیه ده 20 سیاسی حزب و 165 کیشی مستقل کاندید پارلمانگه اورین آلیش اوچون رقابت قیلدی. خودی شو سیلاوده 53 ملیون 765 مینگ 231 کیشی 25 نچی دوره پارلمان اعضالرینی انتخاب قیلیش اوچون رای بیردی. رای بیریش پروسه سی تورکیه ساعتی بیلن ساعت 8:00 ده باشله گن ایکن، آقشم ساعت 17:00 ده اوز نهایه سیگه ییتیب باردی.
جمهور رییس رجب طیب ایردوغان، خانمی امینه ایردوغان و قیزی سومایه ایردوغان استانبول ده رای بیرگن ایکن، ایردوغان سیلاوگه کوپ سانده وطنداشلر قتنشگن بو وضعیت نینگ دموکراسی گه مهم بیر اشاره بولگن لیگی نی معلوم قیلدی. باش وزیر احمد داود اوغلی قونیه ده رای بیرگن ایکن، خانمی ساره داوداوغلی و اوغلی محمد داود اوغلی انقره ده رای بیردی. تورکیه بویوک ملت مجلس باشلیغی جمیل چیچک انقره گول باشی اولوسوال لیگی ده، ملیت چی حرکت پارتی سی باشلیغی دولت باغچه لی، باش وزیر اورین باسری یالچین آق دوغان، تورکیه قوراللی کوچلر قومندانی ستر جنرال نجدد اوزل انقره ده رای بیردی.
اوشبو سیلاو بیلن علاقه لی ساعت 18:00 گچه رادیو، تلویزیون و باشقه نشریه لردن خبر، نتیجه و تبصیره ترقه تیش منع بولگن دیر. بیراق ساعت 18:00 – 21:00 ساعت لری آره سیده انتخابات کمسیونی تمانیدن سیلاو بیلن علاقه لی بیرلگن خبر و تبلیغ لرنینگ ترقه تیلیشی ممکن دیر. ساعت 21:00 دن کیین برچه نشرات آزاد ایتیلر ایکن، سیلاو کمسیونی تمانیدن اجازه بیریلگن تقدیرده ساعت 21:00 دن آلدین هم نشرات بیریش ممکن دیر.