ترکیه جمهوررئیسی اردوغان اوکرائین گه تشریف بیوردی

ترکیه جمهوریتی جمهوررئیسی رجب طیب اردوغان رسمی بیر سفر بیلن اوکرائین گه تشریف بیوردی.
اوکرائین پایتختی کیف ده گی پروگرامی نی مجهول عسکر یادگارلیگی گه گل قویب باشله گن اردوغان, کیین چه لیک اوکرائین جمهوررئیسی پترو پوروشنکو تمانیدن رسمی بیر مراسم بیلن کوتیب آلیندی.
اوشبو مراسم آرتیدن ایسه ایککی جمهوررئیسی آره سیده یککه مه یککه بیر اوچره شو بولیب اوتدی.
کیین چه لیک اردوغان بیلن پوروشنکو تورتینچی یوقاری مرتبه لیک ستراتیژیک همکارلیک ییغیلیشی گه اشتراک ایته دی.
ایریم کیلیشو لر گه قول قویلیشی آرتیدن ایسه ایککی رهبر مشترک بیر مطبوعاتی کنفرانس ترتیب لیدی.
پوروشنکو تمانیدن ترتیب له نه دیگن دعوت گه اشتراک ایتیشی آرتیدن اردوغان اوکرائین باش وزیری آرسینی یاتسینیوک نی قبول ایته دی.
عینی دمده جمهوررئیسی اردوغان قیریم تاتار لری مجلسی نینگ باشلیغی و آهیسکا ترک لری نینگ نماینده لری دن تشکیل تاپگن هیئت نی هم قبول ایته دی.
جمهوررئیسی اردوغان اوکرائین گه حرکت ایتمسدن آلدین بیرگن بیانات لریده, "اوکرائین ده قیریم تاتار لری و آهیسکا ترک لری قرداش لری میز موجود. اولر هم اوشبو بحرانی وضعیت دن تاثیرلنماقده. ترکیه صفتیده اوشبو قرداش لری میز نینگ وضعیتی نی یقین دن تعقیب ایتماقده میز. تاتار قرداش لری میز گه محللی مسئول لر تمانیدن باسیم قیلینیشی نی قبول ایتیشی میز ممکن ایمس" دییه قید ایتگن ایدی.