عمران خان: هندوستان نینگ پاکستان گه قرشی افغانستان توپراق لری دن فایده له نیشی بوییچه خواطرده من

پاکستان باش وزیری عمران خان, هندوستان نینگ اولکه سی نی برقرارسیزلشتیریش اوچون افغانستان توپراق لری دن فایده له نیشی نینگ ممکن ایکن لیگی توغریسیده خواطرده ایکن لیگی نی معلوم قیلدی. 

پاکستان مطبوعاتی ده باسیلیب چیققن خبر لر گه کوره خان, پاکستان-افغانستان تجارت و سرمایه گذارلیک ییغیلیشی ده قیلگن معروضه سیده, پاکستان نینگ افغانستان ده تینچلیک نینگ اورنه تیلیشی بوییچه سعی و حرکت لری نینگ دوام ایته دیگن لیگی نی ینه بیر مرته ایسله تیب اوتدی. 

خان, افغانستان ده کیم نینگ اقتدارده بولیشی گه قره مسدن پاکستان نینگ اوشبو اولکه بیلن بولگن مناسبت لری نی کوچه یتیریش گه قرار قیلگن لیگی نی معلوم قیلرایکن, ایککی اولکه نینگ کیله جگی نینگ بیرلیک و ایککی تامانلمه تجارت میزانی نینگ آرتیریلیشی گه باغلیق ایکن لیگی نی بیلدیردی. 

افغانستان و پاکستان نینگ چین- پاکستان اقتصادی دهلیزی دن فایده له نیشی نینگ ممکن ایکن لیگی نی بیلدیرگن خان, ایککی اولکه نینگ تجارت مرکزی گه ایله نیشی نینگ ممکن ایکن لیگی نی معلوم قیلدی. 

خان, هندوستان نینگ, افغانستان توپراق لری دن فایده له نیب پاکستان نی برقرارسیزلشتیریش گه حرکت قیلیشی بوییچه خواطرده ایکن لیگی نی ایسله تیب اوتدی. 

معروضه سیده کشمیر مسئله سی توغریسیده هم بحث ایتگن خان, مسئله نینگ, بیرلشگن ملت لر تشکیلاتی خوفسیزلیک کینگشی قرار لری گه کوره ییچیلگونگه قدر منطقه و خلق ارا مقیاسده گی برچه ییغیلیش لر ده پاکستان تامانیدن کون ترتیبی گه کیتیریله دیگن لیگی نی بیلدیردی.