تورکیه نینگ مطبوعات خلاصه لری
تورکیه نینگ مطبوعات خلاصه لری
حریت گزیتهسی: جمهور باشلیغی ایردوغهندن بیاناتلر.
جمهور باشلیغی رجب طیب ایردوغهن توناون بیرگن بیاناتیده، آذربایجان و ارمنستان اورتهسیدهگی کیلیشوو حقیده، «تورکيه کیلیشوونینگ یولگه قوییلیشینی نظارت قیلیش اوچون منطقهده تشکیل تاپهدیگن قوشمه تینچلیک کوچیده روسیه بیلن بیرگهلیکده اورین آلهدی. آتشکیسین نظارتی اوچون تشکیل تاپهدیگن مشترک تورک – روس مرکزی حقیده انگلشوو کیلیشوویگه بوگون ایرتهلب قول قوییلدی» دیدی.
خبر تورک گزیتهسی: تشقی ایشلر وزیرلیگی نینگ امریکا قوشمه ایالتلری تشقی ایشلر وزیری پامپیو نینگ تورکيهگه تشریف اویوشتیریشی حقیدهگی بیاناتی. تشقی ایشلر وزیرلیگی امریکا قوشمه ایالتلری تشقی ایشلر وزیری مایک پامپیونینگ، تورکيهگه تشریف اویوشتیریشی حقیده بیانات بیردی. اونده پامپیو نینگ فینیر پتریکلیگی بیلن تورکيه و منطقهدهگی دیني مسألهلرنی قولگه آلیشی حقیده، «امریکا قوشمه ایالتلری نینگ اوّلا آینهگه قرهشی و اوز یورتیدهگی عرقچیلیک، اسلام دشمنلیگی و نفرت جنایتلری کبی انسان حقوقلری پایماللریگه کیرهکلی چارهنی کوریشی توغریراق بولهدی.» دیگن افادهلرگه اورین بیریلدی.
صباح گزیتهسی: آذربایجان نینگ قارهباغ غلبهسینی انگلستان مطبوعاتی: «اوروش نینگ اینگ بویوک غالبی تورکيه» دیب بهالهدی. انگلستانده تیلیگراف، تایمس و گوئاردیان گزیتهلریده آذربایجان نینگ قارهباغ غلبهسی حقیده عجایب سرلوحهلرگه اورین بیریلدی. اونده آذربایجان و ارمنستان اورتهسیدهگی آتشکیسین کیلیشوویگه توختهلدی و تاغلی قارهباغدهگی اوروش نینگ حقیقي غالبی تورکيه ایکنی شونینگدیک، انقره نینگ منطقهدهگی حل قیلووچی رولی نینگ اوزگرمس کوچگه ایلنگنی، غرب نینگ ایسه بیر چیتگه تورتیلگنی قید ایتیلدی.
یینی شفق گزیتهسی: فاتح دونمز: «قانوني، قاره دینگیزده اوز فعالیتینی باشلهیدی.» انرژی و طبيعي منبعلر وزیری فاتح دونمز، «ینگیلش ایشلری تماملنگن حالده، مرسیندهگی تاش اوجو بندریدن یولگه چیققن قانوني نامیدهگی بورغولش کیمهمیز، 2021 – ییل نینگ ایلک آیلریده قاره دینگیزده اوز فعالیتینی باشلهیدی.» دیگن افادهلرگه اورین بیردی.
ستار گزیتهسی: «15 – جولای شهیدلر کوپریگی» ده فورمولا – 1 و تورکيه اوچون ینگیلیک قید ایتیلدی. فورمولا – 1 گراندی نینگ 14 – باسقیچی «فورمولا – 1 دی ایچ ایل تورکیش گراند پریکس 2020» دن آلدین ایستانبولنی تنیشتیریش حقیدهگی صورهتگه آلیش جریانی دایرهسیده توناون «15 – جولای شهیدلر کوپریگی» خدمتگه بیکیتیلدی. فورمولا – 1 گراندی نینگ «ریدبولل راسینگ» پیلوتی الیکسندر البان، فورمولا - 1 آرقهلی «15 – جولای شهیدلر کوپریگی» دن اوتدی. بو آرقهلی آسیا تامانیدن اروپاگه اوتیشده فورمولا – 1 و تورکيه تاریخیده، دنیا نینگ بیرینچی قطعهلرارا پیت – ستوپی اوتکزیلدی.