اشرف غنی بیر قطار جنرال و اداره چیلرنی وظیفه دن چیتلندیردی

افغانستان دولت رهبری محمد اشرف غنی، پایتخت کابلده هجوملرنینگ آرتیب بارگن لیگی باعث 2 جنرال و 7 نفر یوقاری مرتبه لی اداره چینی وظیفه دن چیتلندیردی. عینده 164 جنرالنی تقاعدگه سوق ایتدی.

جمهور رئیس لیک سوزلاوچیسی شاه حسین مرتضوی، غنی نینگ سونگی کونلرده آرتیب بارگن هجوملرده وظیفه لرینی بجا کیلتیرمه گنلیکلری اوچون  2 جنرال و 7 نفر یوقاری مرتبه لی اداره چینی وظیفه دن چیتلندیرگنینی ایتدی.

خودی شو اداره چیلرنینگ محکمه بولیشینی خبر بیرگن مرتضوی، وظیفه سینی بجا کیلتیرمه گن هرکیم هم بولسه تحقیق بولرلیگینی بیان ایتدی.

مرتضوی، اشرف غنی نینگ عسکری سویه ده ینگی لیکلر کیلتیریلیشی اوچون 164 جنرالنی هم تقاعدگه سوق ایتگنینی قید ایتدی.

پایتخت کابلده تقریباً 2 هفته آلدین ایسکی ایچکی ایشلر وزیرلیگی نینگ بناسی نینگ یقینیده بیر عراده امبولانس آرقه لی عملگه آشیریلگن تروریستیک هجومده 103 کیشی اولیب 250 دن آرتیق نفر یره دار بولگن ایدی.

باشقه بیر تاماندن، پایتخت کابلده گی تروریستیک هجوملرگه مانع بولیش ایچکی ایشلر و مدافعه وزیرلیکلری بیلن ملی امنیت ریاستی ینگی خوفسیزلیک پلانی تیارله گن.

مملکت خوفسیزلیک ضعافیتی باعث هر کون اونلب وطنداش اوی – جایلرینی ترک ایتیب "خوفسیز جای" اوله راق کابل گه کوچ قیلیب کیلماقده لر.

بیراق متخصصلر نفوسی 5 ملیوندن کوپه ییب کیتگن کابلده گی تروریستیک هجوملر نینگ شهرنینگ خوفسیزلیگین برهم اورگنینی ایتماقده لر.

افغانستان ایچکی ایشلر وزیرلیگی نینگ راپوریگه کوره، اوتگن آی یوز بیرگن 22 تروریستیک حادثه دن 5 ته سی کابلده عملگه آشیریلگن.