түркийә б д т да «икки дөләтлик һәл қилиш чариси»ниң әһмийитини тәкитлиди

түркийә авази радийоси хәвири: әһмәд йилдиз б д т ниң америка қошма иштатлириниң нийуйорктики мәркизидә чақирилған  җиддий йиғинида сөз қилди.

б д т омумий кеңишиниң 10-майдики <пәләстинниң б д т ға толуқ әза болушиниң хәвпсизлик кеңишидә қайта музакирә қилинишини тәләп қилған> қарариниң 143 дөләтниң қоллишиға еришишиниң, хәлқара җәмийәтниң ортақ позитсийәсини намайан қилип беридиғанлиқини билдүргән баш әлчи йилдиз, түркийәниң бу тарихий қарарға ортақ йетәкчилик қилғанлиқидин иптихарлинидиғанлиқини билдүрүп: «бу қарарниң мақуллиниши пәләстинниң дөләт қуруш йолидики муһим абидә болупла қалмастин, у йәнә б д т хәвпсизлик кеңиши билән хәлқара җәмийәтниң садаси оттурисидики күнсери күчийиватқан пәрқиниму намайан қилип бериду» деди.

ғәззә вә ғәрбий қирғақ (ийордан дәрйасиниң ғәрбий қирғиқи)тики вәзийәтниң йәнила еғир икәнликигә ишарәт қилған йилдиз: «пәләстин хәлқи хәлқара қанунға қәтий һөрмәт қилинмастин, виҗдансизларчә һуҗум нишани қилинмақта» деди.

баш әлчи йилдиз рәфаһтики күнсери күчийиватқан җиддийликниң кишини әндишигә салидиғанлиқини, ғәззәдә тепилған коллектип қәбриләрниңму вәзийәтниң еғирлиқини көрситип беридиғанлиқини тәкитләп, исраилийәниң ғәззәдики рәһимсизликиниң дәрһал ахирлишиши керәкликини вә униң қайтиланмаслиқи үчүн, пәләстин мәсилисиниң икки дөләтлик һәл қилинишиниң шәрт икәнликини әскәртти.

йилдиз түркийәниң пәләстинниң б д т ға толуқ әза болушини қоллайдиғанлиқини, бу қәдәмниң пәләстинликләрниң игилик һоқуқи вә мустәқиллиқ нишанини әмәлгә ашурушиға капаләтлик қилидиғанлиқи һәмдә икки дөләтлик һәл қилиш чарисиниң сүритини тезлитидиғанлиқини ейтти.

түркийәниң б д т дики даимий вәкили йәнә: «пәләстин б д т ниң толуқ әзаси болушқа вә хәлқара җәмийәтниң баравәр әзаси сүпитидә муамилә қилишқа әрзийду» дегәнләрни сөзлиригә илавә қилди.