تۈركىيە ئىسرائىلىيە تاشقى ئىشلار مىنىستىرىنىڭ باياناتلىرىنى رەت قىلدى

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى ئىسرائىلىيە تاشقى ئىشلار مىنىستىرى يىسرائىل كاتزنىڭ <تۈركىيەنىڭ ئىسرائىلىيەگە قاراتقان سودا چەكلىمىسىنىڭ كۆپ قىسمىنى بىكار قىلغانلىقى> توغرىسىدىكى بىلجىرلاشلىرىغا رەددىيە قايتۇردى.

تۈركىيە جۇمھۇرىيىتى سودا مىنىستىرى ئۆمەر بولات ئىسرائىلىيە تاشقى ئىشلار مىنىستىرىنىڭ بايانلىرىنىڭ خام خىيالدىن باشقا نەرسە ئەمەسلىكىنى ئوتتۇرىغا قويۇپ: «بىز ھۆكۈمەت بولۇش سۈپىتىمىز بىلەن، ئىسرائىلىيە بىلەن بولغان سودا توغرىسىدا چىقارغان قارارىمىزدا چىڭ تۇرۇۋاتىمىز. بۇ قارار كۈچكە ئىگە. بىزنىڭ ئىسرائىلىيە بىلەن بولغان سودىنى توختىتىش قارارىمىز <ئىسرائىلىيەنىڭ غەززەگە قاراتقان ھۇجۇملىرىنى توختىتىپ، ئۇزۇن مۇددەتلىك ئۇرۇش توختىتىش كېلىشىمىنىڭ ھاسىل قىلىنىشى ۋە غەززەدىكى پەلەستىنلىك قېرىنداشلىرىمىزغا ئىنسانپەرۋەرلىك ياردەملىرىنىڭ ئۈزلۈكسىز يەتكۈزۈلۈشىگە كاپالەتلىك قىلىشتىن ئىبارەت> شەرتىمىز ھازىرلانغۇچە كۈچكە ئىگە» دېگەنلەرنى قەيت قىلدى.