كۇۋەيت ئەمىرى ساباھ تۈركىيەگە يېتىپ كەلدى

تۈركىيە ئاۋازى رادىيوسى خەۋىرى: جۇمھۇر رەئىس رەجەپ تاييىپ ئەردوغان كۇۋەيت ئەمىرى مەشئەل ئەلئەھمەد ئەلجابىر ئەسساباھنى پايتەخت ئەنقەرەدىكى ئەسەنبوغا ئايرودۇرۇمىدا مۇراسىم ئۆتكۈزۈپ كۈتۈۋالدى.

 2023-يىلى 16-دېكابىر تەختكە ئولتۇرغان كۇۋەيت ئەمىرى ساباھنىڭ تۈركىيە زىيارىتى، ئەرەب دۇنياسى سىرتىدىكى تۇنجى دۆلەت ئىشلىرى زىيارىتى بولۇپ ھېسابلىنىدۇ.

دىپلوماتىك مۇناسىۋەت ئورنىتىلغانلىقىنىڭ 60 يىللىقى مۇناسىۋىتى بىلەن ئېلىپ بېرىلىدىغان بۇ زىيارەت يەنە، كۇۋەيتتىن ئارىدىن 7 يىل ئۆتكەندىن كېيىن تۈركىيەگە قىلىنغان تۇنجى ئەمىر دەرىجىلىك زىيارەت بولۇپ، زىيارەت جەريانىدا، ئىسرائىلىيەنىڭ غەززە ھۇجۇملىرى ۋە رايون خاراكتېرلىك ئۆزگىرىشلەر مۇزاكىرە قىلىنىدۇ.

ئىككى تەرەپنىڭ سۆھبەت كۈنتەرتىپىدە، سودا، مۇداپىئە سانائىتى، ساياھەت ۋە مەبلەغ سېلىش قاتارلىق مۇھىم تېمىلار بار. زىيارەت جەريانىدا، ئىككى دۆلەت ئوتتۇرىسىدا يېڭى كېلىشىملەرنىڭ ئىمزالىنىشى پىلانلانماقتا.