әлрайи тәкшүрүши: әрдоған ғәрбий балқан дөләтлириниң әң йақтурулидиған рәһбири

түркийә авази радийоси хәвири: хәлқара җумһурийәтчиләр институти албанийә, боснийә-гертсеговина, қаратағ, шималий македонийә, сербийә вә косовода «ғәрбий балқан райони  әлрайи тәкшүрүши» елип барди.

тәкшүрүшкә асасланғанда, мәзкур дөләтләрниң пуқралиридин бир қатар башқа мәсилиләр билән бирликтә, «дунйа вә район рәһбәрлириниң қайсисиға иҗабий қарайсиз?» дәп соралған.

әлрайини синашқа қатнашқан албанийәликләрниң %71 и җумһур рәис әрдоғанға иҗабий қарайдиғанлиқини билдүргән. албанийәдики тәкшүрүштә, җо байдин иккинчи, ши җинпиң үчинчи болған.

боснийә-гертсеговинада охшаш соалға җаваб бәргәнләрниң %61 и әрдоғанни йақтуридиғанлиқини билдүргән болса, русийә пирезиденти виладимир путин, америка пирезиденти байдин вә хитай дөләт рәиси ши җинпиң %37 әтрапида авазға еришкән.

қаратағдиму әрдоған биринчи, путин иккинчи, ши җинпиң үчинчи болған.

шималий македонийәдиму әрдоған %66 авазға еришип биринчи болған, униңдин қалса, русийә пирезиденти виладимир путин, америка пирезиденти җо байдин, әң ахирида болса, хитай дөләт рәиси ши җинпиң орун алған.

сербийәдә җумһур рәис әрдоған русийә пирезиденти виладимир путин, хитай дөләт рәиси ши җинпиңдин кейинки үчинчи рәһбәр болған

косовода америка пирезиденти байдин биринчи қатардин, җумһур рәис әрдоған иккинчи қатардин орун алған.

тәкшүрүшкә албанийәдин 1216, боснийә вә гертсеговинадин 1225, шималий македонийәдин 1220, қаратағдин 1036, сербийәдин 1238, косовадин 1203 киши қатнашқан.