ترک وزیر خارجہ کی پاکستانی ہم منصب سے ملاقات

وزیر خارجہ حاقان فیدان نے پاکستان کے سرکاری دورے کے دوران نائب وزیراعظم اور وزیر خارجہ محمد اسحاق ڈار سے ملاقات کی۔

ملاقات کے دوران دو طرفہ تعلقات اور ساتویں پاک ترک اعلیٰ سطحی سٹریٹجک کوآپریشن کونسل کی تیاریوں پر تبادلہ خیال کیا گیا۔

فıدان نے بعد میں پاکستان کے وزیر خارجہ کے ساتھ مشترکہ پریس کانفرنس میں کہا،انہوں نے کہا کہ ترکیہ اور پاکستان  مسلم امہ کی آواز کو  ہر جگہ پہنچانے کے لیے مل کر کام کرتے رہیں گے۔ہم نے واضح کیا ہے کہ ہم عالمی و علاقائی معاملات پر پاکستان کی حمایت کرتے ہیں۔ طویل سرحد ہونے کے باعث افغانستان میں ہونے والی سرگرمیوں کا پاکستان پر براہ راست اثر پڑتا ہے۔ ہم اپنے افغان بہنوں بھائیوں کے لیے مستقل امن و استحکام کے خواہشمند ہیں۔

انہوں نے کہا کہ ہم نے فلسطینی بہن بھائیوں کی حالت زار پر بھی تبادلہ خیال کیا ہے۔ ہم غزہ میں فوری جنگ بندی کا مطالبہ کرتے ہیں۔ مکمل فتح کی خواہش میں اسرائیل پورے خطے کے امن کو داؤ پر لگا رہا ہے۔ ہم اقوام متحدہ، او آئی سی کے ساتھ مل کر قیام امن کی کوششیں کر رہے ہیں۔

وزیر خارجہ و نائب وزیراعظم اسحاق ڈار نے اس موقع پر کہا کہ پاکستان اور ترکیہ کے درمیان دیرینہ تعلقات ہیں ، یہ دو ممالک ایک قوم ہیں۔ دونوں ممالک کے درمیان اسٹریٹیجک اور دو طرفہ تعلقات ہیں ۔ آج ہماری وفود کی سطح پر بات چیت ہوئی، جس میں تجارت، دفاع اور  اقتصادی تعاون پر بات چیت کی گئی۔ اسی طرح عوام سے عوام کے روابط بھی بات چیت کا اہم حصہ ہیں۔

انہوں نے کہا کہ دونوں ممالک کے درمیان تجارت کا حجم 5 ارب ڈالر تک لے جانا چاہتے ہیں اور جلد ہی تجارتی تعلقات کے حوالے سے باقاعدہ اکنامک فریم ورک کی تیاری پر مذاکرات ہوں گے۔ ہم ایک دوسرے کی سرحدوں کے تحفظ اور دہشت گردی کے نمٹنے کے لیے مزید تعاون کو مضبوط کریں گے۔

اسحاق ڈار نے کہا کہ اسلامو فوبیا کے خلاف بھی پاکستان اور ترکیہ کا موقف یکساں ہے اور اس پر مشترکہ کوشش جاری رہیں گی۔

پاکستان کے وزیر اعظم شہباز شریف نے بھی اپنے سرکاری رابطوں کے ایک حصے کے طور پر وزیر خارجہ فیدان کو اسلام آباد میں شرفِ ملاقات بخشا۔