آنتالیانینگ شو ییل توریسم پوداغیندا رکورد قوُیماغینا قاراشیلیار

آنتالیانینگ توریسم پوداغی اۆچین شو ییل رکورد ییلی بوُلار.

تۆرکیأنینگ سیاحات آژانسلاری بیرلیگی نینگ (Türsab) آق دنگیزدأکی یوُلباشچیسی رضا پرچین 2024-نجی ییلینگ آنتالیا اۆچین توریسم تایدان رکورد ییلی بوُلجاقدیغینی آیتدی.

پرچین رزرو سیستمی نینگ اؤرأن یاغشی بوُلاندیغینی آیتدی و انگلستان و لهستان باشدا بوُلماق بیلن اوروپالی یورتلاردان بوُلان رزرواسیونلارینگ اومیت بریجی بوُلاندیغینی سؤزلرینه قوُشدی.

پرچین مای آییندا روس توریستلارینگ آنتالیا گلمأگه باشلاجاقدیغینی نیغتادی و گلن روس توریستلارینگ سانی نینگ اؤتن ییلدان دا کؤپ بوُلجاقدیغینا اینانیاندیقلارینی بیلدیردی.

پرچین "آنتالیا 17 میلیونا قوُلای توریست گلجکدیر دیأن بوُلساق شوُلارینگ 70-80 گؤتریمی All inclusiv گؤرنۆشینده دینچ آلیار. بیز بو اولغامی اؤرأن قوُوی یاغدایدا آلیپ باریاریس" دیدی.

اؤتن ییل آنتالیا 15 میلیون 689 مۆنگ 258 توریستا یر ایه چیلیگینی ادیپ رکورد قوُیوپدی.