Ysraýylyň Gazada soňky 24 sagatda guran hüjümlerinde ýene-de ençeme palestinaly ýogaldy

Gaza sektory täze ýyla Ysraýylyň hüjümleri astynda gadam basdy. 

Ysraýyl soňky 24 sagatda bolsa ýene-de 156 palestinalyny öldürdi. 

Palestinanyň Saglygy goraýyş ministrliginiň metbugat geňeşçisi Eşref al Kudra hüjümleriň başlan güni bolan 7-nji oktýabrdan bäri ýogalan palestinalylaryň sanynyň 21 müň 978 adama, ýaralananlaryň sanynyň bolsa 57 müň 697 adama ýetendigini mälim etdi. 

Ysraýylyň hüjümlerinde 326 saglygy goraýyş edarasynyň işgäriniň ýogalandygyny we 104 tiz kömek ulagynyň hatardan çykarylandygyny aýdan Kudra, 150 saglygy goraýyş edarasynyň nyşana alynandygyny, 30 hassahananyň hyzmat bermegini bes edendigini aýan etdi.

Kudra mundan başgada 99 saglygy goraýyş işgäriniň Ysraýylly esgerler tarapyndan tussag edilendigini beýan etdi.

Gazadaky hökümediň metbugat ofisinden berilen beýanatda 70 göterimi zenanlardan we çagalardan ybarat jemi 7 müň adamyň harabalyklaryň aşagyndadygyny we dereksiz ýitendigini aýan etdi.

Berilen beýanata görä 106 žurnalist Ysraýylyň guran hüjümlerinde ýogaldy, 10 žurnalist tussag edildi. 

Öz ýaşaýan ýerlerinden başga ýere göçürilen palestinalylaryň ýaşaýan wagtlaýyn düşelgelerde 355 müň adamyň ýokanç kesel bilen keselländigi anyklandy. 

Ysraýylyň goşunynyň howa hüjümleriniň netijesinde Gaza sektorynda 126 hökümet binasy bilen 92 mekdep we uniwersitet ýer bilen ýegsan edildi, 285 mekdep we uniwersitet bölekleýin häsýetde ýumruldy. 65 müň ýaşaýyş binanyň, 119 metjidiň we 3 buthananyň dolulygyna ýumrulan Gaza sektorynda jemi 290 müň ýaşaýyş binasyna zeper ýetdi.  

Palestinanyň medeni mirasyny hem nyşana alan Ysraýyl, hüjümleri bilen Gazada 200 taryhy we medeni mirasy ýumurdy. 

Hamasyň harby şahasy Kassam topary 7-nji oktýabrda "Aksa tupany" ady bilen giň gerimli hüjümler başladandygyny habar beripdi. 

Ysraýyl oňa jogap hökmünde harby uçarlary bilen Gaza sektoryna garşy "Demir Gylyçlar" atly operasiýa başladandygyny mälim edipdi. 

Başdan geçirilýän dartgynlykda häzirki wagta çenli aglabasy çaga bolan 21 müň 800-den gowrak palestinaly ýogaldy.