تورکیه مسئوللاریندان ایرانا باش‌ساغلیغی
ابراهیم رئیسی و خاریجی ایشلر ناظیری حسین امیر عبداللهیانین هلیکوپتر قضاسیندا حیاتینی ایتیرمه‌سی ایله باغلی تورکیه‌دن ده باش‌ساغلیغی مساژلاری گلیر
ایرانین 8-جی پرزیدنتی ابراهیم رئیسی و خاریجی ایشلر ناظیری حسین امیر عبداللهیانین هلیکوپتر قضاسیندا حیاتینی ایتیرمه‌سی ایله باغلی تورکیه‌دن ده باش‌ساغلیغی مساژلاری گلیر.
تورکیه بؤیوک میللت مجلیسینین صدری نعمان کورتولموش سوسیال مئدیا حسابینداکی پایلاشیمیندا بونلاری قید ائدیب:
"فاجعه‌لی قضادا حیاتینی ایتیرن ایران پرزیدنتی جناب ابراهیم رئیسی‌یه الله‌دان رحمت دیلَییر، عائله‌سینه، دوست و قارداش ایران خالقینا باش‌ساغلیغی وئریر، آجیلارینی بؤلوشورم. عینی قضادا اؤلن ایرانین خاریجی ایشلر ناظیری حسین امیر عبداللهیان و دیگر مرحوملار اوچون باش‌ساغلیغی وئریرم.
جمهورباشقانی یاردیمچیسی جودت ییلماز سوسیال مئدیا حسابیندان پایلاشیمیندا، "هلیکوپتر قضاسی نتیجه‌سینده حیاتینی ایتیرن ایران پرزیدنتی ابراهیم رئیسی‌یه، ایرانین خاریجی ایشلر ناظیری حسین امیر عبداللهیان و اونلاری موشایعت ائدن هیئته الله‌دان رحمت ایستییب، عائله‌لرینه، دوست و قارداش ایران خالقینا و دؤولتینه باش‌ساغلیغی وئریرم." دئدی.
عدالت و کالکینما پارتیسی صدری موعاوینی و پارتی سؤزچوسو عمر چئلیک سوسیال مئدیا حئسابیندان ائتدییی پایلاشیمدا، هلیکوپتر قضاسیندا رئیسی و عبداللهیان و اونلاری موشایعت ائدن هیئتین حیاتینی ایتیرمه‌سی ایله باغلی درین کدرلندیگینی بیلدیریب،
"ایران دؤلتینه و قارداش ایران خالقینا باش‌ساغلیغی وئریریک. قارداش ایران خالقینین کدرینی پایلاشیریق." دئدی.
جمهورباشقانی ایلتیشیم (ارتباطات) باشقانی فخرالدین آلتون اؤز پایلاشیمیندا هلیکوپتر قضاسیندا رئیسی و عبداللهیان و اونلاری موشایعت ائدن هیئتین حیاتینی ایتیرمه‌سی ایله باغلی «عائله‌لرینه و دوست و قارداش ایران خالقینا» باش‌ساغلیغی وئریب.
ایلگیلی‌لی خبرلر
جمهور باشقانی اردوغان کوزوو باش ناظیری ایله گوروشوب
جمهور باشقانی رجب طیب اردوغان پایتاخت آنکارادا تماس‌لارینی داوام ائتدیریر.
