اولو اؤندر آتاتورکو یاد ائدیریک
بو گون اولو اؤندر آتاتورکون وفاتینین 85-جی ایلدؤنومودور...
حربی و سیاسی دوهاسی ایله آدینی تورک و دونیا تاریخینه قیزیل حرفلرله یازدیران مصطفی کمال آتاتورک 10 نویابر 1938-جی ایل ساعت 09:05-ده ایستانبولدا دولماباخچا ساراییندا وفات ائتدی.
تورکیئ جومهوریتینین قوروجوسو مصطفی کمال آتاتورک وفاتینین 85-جی ایلدؤنومو ایله علاقهدار اؤلکه داخیلینده، شیمالی کیبریس (کیپر) تورک جومهوریتینده و خاریجی اؤلکهلرین سفیرلیکلرینده مراسیملر و تدبیرلرله یاد ائدیلیر.
تدبیرلر چرچیوهسینده دؤولت رسمیلری پایتاخت آنکارادا آتاتورکون جنازهسینین یئرلشدیگی آنیت قبری زیارت ائدیبلر.
جمهور باشقانی رجب طیب اردوغانین رهبرلیک ائتدیگی نوماینده هئیتی آتاتورکون مقبرهسی اؤنونه اکلیل قویوب.
آنیت قبر خاطره دفترینی ایمضالایان جمهور باشقانی اردوغان "حؤرمتلی آتاتورک، اؤلومونوزون 85-جی ایلدؤنومونده سیزی، دؤیوش یولداشلارینیزی، وطنیمیز اوغروندا شهید اولان قهرمانلاریمیزی و عینی ایدهآل اوغروندا قانلارینی تؤکن غازی لریمیزی بیر داها رحمتله یاد ائدیریک. تورکیه-نین اینکیشافینا، تورکیه عصری"نین قورولماسینا و میللتیمیزین چوخ عصرلیک هدفلرینه چاتماسیندا هئچ بیر گوج مانعه اولا بیلمهیهجکدیر" دئییب.
تورکیه بؤیوک میللت مجلیسینین صدری نومان کورتولموش پایتاخت آنکارادا آتاتورکون جنازهسینین یئرلشدیگی آنیت قبیرده کئچیریلهجک رسمی مراسیمده و پرزیدنت ایقامتگاهینداکی آنیم تدبیرینده ایشتیراک ائدهجک.
تورکیه بؤیوک میللت مجلیسینین صدری نومان کورتولموش تورکیه جمهوریتینین قوروجوسو غازی مصطفی کمال آتاتورکون وفاتینین 85-جی ایلدؤنومو ایله علاقهدار پایلاشیم ائدیب.
نومان کورتولموش سوسیال مئدیا حسابینداکی پایلاشیمیندا بونلاری دئییب:
"تورکیه بؤیوک میللت مجلیسینین ایلک پرزیدنتی و جمهوریتیمیزین قوروجوسو غازی مصطفی کمال آتاتورکو وفاتینین 85-جی ایلدؤنومونده احتیراملا یاد ائدیریک. روحو شاد اولسون. جانینی وطنیمیز اوچون فدا ائدن بوتون شهیدلریمیزین، وفات ائدن بوتون غازی لریمیزین مکانلاری جنت اولسون" دئییب.
خاریجی ایشلر ناظیری هاکان فیدان دا سوسیال مئدیا حسابیندا آتاتورکو یاد ائتدیگی پایلاشیم ائدیب.
ناظیر فیدان پایلاشیمیندا "فورصتدن ایستیفاده ائدهرک، میللی خاریجی سیاستیمیزله اؤلکهمیزین اگمنلگینی و موستقیللیگینی محکملندیرمک عزمینده اولدوغوموزو بیر داها وورغولاییر، قورتولوش دؤیوشوموزون بوتون قهرمانلارینی، باشدا غازی مصطفی کمالی رحمت و میننتدارلیقلا یاد ائتمک ایستردیم" دئییب.
دیانت ایشلری باشقانلیغی دا غازی مصطفی کمال آتاتورکون وفاتینین 85-جی ایلدؤنومونده درج ائتدیگی مئساژلا اونو آنیب.
باشقانلیق طرفیندن 10 نوامبر آتاتورکو آنما گونو موناسیبتیله یاییملانان مئساژدا 100 ایللیگی تامام اولان جمهوریتین بانیسی غازی مصطفی کمال آتاتورکون وفاتینین 85-جی ایلدؤنومونده حؤرمت و میننتدارلیقلا آنیلدیغی بیلدیریلیب.
مئساژدا "بیزه بؤیوک فداکارلیقلا امانت ائدیلمیش جنت وطنیمیزی، اونون دگرلرینی محکملندیرمگی، گلهجهیه داشیماغی قهرمان اجدادلاریمیزا، شانلی تاریخیمیزه صداقت بورجوموز کیمی گؤروروک. شرفلی کئچمیشین اؤولادلاری کیمی ، بوگونکو بورجوموز مدنیت دگرلریمیزی یاشاتماق، دؤولتیمیزین یاشاماسی و میللتیمیزین ریفاهی نامینه بوتون گوجوموزله چالیشماق، اجدادلاریمیزین ترتمیز ارثینی گلهجهیه داشیماقدیر" دئییلیب.
ایلگیلیلی خبرلر
رجب طیب اردوغان برونئی، سومالی و ایسپانیا سفیرلرینی قبول ائدیب
برونئی، سومالی و ایسپانیا سفیرلری اعتیمادنامهلرینی اردوغانا تقدیم ائدیبلر