تورک دؤولتلری تشکیلاتی، آوروپا بیرلیگی ایله ایلیشکیلری گلیشدیریر
"بو سفر تورک دؤولتلری تشکیلاتینین بؤلگهسینده و اولوسلارآراسی ساحهدهکی آرتان سیاسی رولونون گؤستریچیسیدیر"
تورک دؤولتلری تشکیلاتی (تدت) باش کاتیبی ائلچی کوبانیچبک عؤمورعلییئو، تورک دؤولتلری تشکیلاتی ایله آوروپا بیرلیگی آراسیندا "ساغلام بیر زمین" میدانا گتیرمک اوچون، بلژیکین باشکندی بروکسلده آوروپا بیرلیگی قوروملارینا گئتدی.
تورکیهنین آوروپا بیرلیگی دائمی نمایندهسی ائلچی فاروق قایماقچی، باش کاتیب عؤمورعلییئوین بروکسله سفری سببی ایله ضیافت وئردی.
ضیافته تورک دؤولتلری تشکیلاتی عضوو اؤلکهلر ایله گؤزلمچی اؤلکهلرین ائلچیلرینین یانی سیرا آوروپا بیرلیگی کمیسیونو، آوروپا پارلمانی، آوروپا بیرلیگی شوراسیندان نمایندهلر ایله چوخ ساییدا قوناق قاتیلدی.
ضیافتده دانیشان عؤمورعلییئو، آوروپا بیرلیگی قوروملارینا گئدن ایلک تورک دؤولتلری تشکیلاتی باش کاتیبی اولدوغونو ایفاده ائدرک، "بو سفر تورک دؤولتلری تشکیلاتینین بؤلگهسینده و اولوسلارآراسی ساحهدهکی آرتان سیاسی رولونون گؤستریچیسیدیر" دئدی.
عؤمورعلییئو، وظیفه مدتینده تورک دؤولتلری تشکیلاتی-آوروپا بیرلیگی ایلیشکیلری اوچون ساغلام بیر زمین یارادیلماسی و آوروپا بیرلیگی قوروملارییلا امکداشلیق قورولماسی اوچون چالیشاجاغینی دیله گتیردی.
تورک دؤولتلری تشکیلاتی اؤلکهلرینین انرژی عرضهسی و گوونلیگینده اؤنملی یئری اولدوغونو، آسیا ایله آوروپا آراسیندا حیاتی بیر ترانزیت یولو اولدوغونو خاطیرلادان عؤمورعلییئو،
"تورک دؤولتلری کورهسل غذا و انرژی تهلوکهسیزلیگی ایله کسینتیسیز مال عرضهسینی تامین ائتمهیه حاضردیر" ایفادهسینی ایشلتدی.
تورکیهنین آوروپا بیرلیگی دائمی نمایندهسی ائلچی قایماقچی دا تورک توپلوملارینین یالنیز اورتا آسیادا و آنادولودا دئییل، اوکراینا، بالکانلار و آوروپا کیمی گئنیش بیر جغرافیادا اولدوغونو خاطیرلاتدی.
قایماقچی، "اورتا آسیا و تورک دونیاسی، آوروپا اوچون اؤزللیکله نفلیات، انرژی کیمی ساحهلرین یانیندا باریش و ثابتلیک اوچون ده اؤنملیدیر. بو سببله تورک دؤولتلری تشکیلاتینین بروکسلده داها چوخ وارلیغینین اولماسی، آوروپا بیرلیگینین تورک دؤولتلری تشکیلاتی ایله داها یاخشی و یاپیسال ایلیشکیلر گلیشدیرمهسی لازیم اولدوغونا اینانیریق" دئدی.