آذربایجان: گؤروشمه فایدالی و نتیجه مرکزلی اولدو
"گؤروشمه‌نی، ایکی اؤلکه آراسین‌داکی نورماللاشما مدتینین ایرلیله‌دیلمه‌سی باخیمیندان فایدالی و نتیجه مرکزلی اولاراق دگرلندیریریک"
باکی، آذربایجان و ارمنیستان لیدئرلرینین، بلژیکین باشکندی بروکسل‌ده ائتدیگی گؤروشمه‌نین، "ایکی اؤلکه آراسین‌داکی نورماللاشما مدتینین ایرلیله‌دیلمه‌سی باخیمیندان فایدالی و نتیجه مرکزلی" اولدوغونو بیلدیردی.
آذربایجان خاریجی ایشلر باخانلیغی، آذربایجان جمهورباشقانی ایلهام علییئو، ارمنیستان باشباخانی نیکول پاشینیان و آوروپا بیرلیگی شوراسی باشقانی شارل میشلین دونن گئرچکلشدیردیگی بئشینجی اوچلو ییغینجاغا باغلی یازیلی آچیقلاما یاییملادی.
آچیقلامادا، "گؤروشمه‌نی، ایکی اؤلکه آراسین‌داکی نورماللاشما مدتینین ایرلیله‌دیلمه‌سی باخیمیندان فایدالی و نتیجه مرکزلی اولاراق دگرلندیریریک" دئییلدی.
گؤروشمه‌ده، طرفلرین ارمنیستان و آذربایجان آراسیندا باریش آنلاشماسی لایحه‌سی اوزرین‌ده آنلاشمایا واریلماسی، سرحدلرین تعیین اولونماسی و نقلیات باغلانتیلارینین یئنی‌دن قورولماسی مؤوضوعلارین‌دا ملموس نتیجه‌لره چاتیلماسی مقصدیله آیرینتیلی فیکیر آلیش وئریشی ائدیلدیگی ایفاده ائدیله‌ن آچیقلامادا، بو ایفاده‌لر یئر آلدی:
"آذربایجان طرفینین بؤلگه‌ده باریش و ثابیتلیگین تامین ائدیلمه‌سینه باغلی توتومو بیر دفعه داها طرفلرین دقتینه سونولدو. اؤزللیکله دؤولتلرین تورپاق بوتونلوگونه سایغینین تصدیق ائدیلمه‌سی و بو باغلامدا آذربایجانین اولوسلارآراسی قبول گؤرموش تورپاق بوتونلوگونون ارمنیستان طرفین‌دن ده قبول ائدیلمه‌سی سون درجه اؤنملیدیر.
گؤروشمه آیریجا چاتیشما سونراسی نورماللاشما اوچون اؤنملی اولان اینسانی مؤوضوعلارین موذاکیره ائدیلمه‌سی اوچون بیر فورصت تامین ائتدی. بو چرچیوه‌ده ایتکین شخصلرین عاقیبتینین دقیقلشدیریلمه‌سینین و مین تمیزله‌مه ساحه‌لرین‌ده‌کی آددیملارین سورعتلندیریلمه‌سینین اؤنمی بیر دفعه داها وورغولاندی".
