برزیلده لئیسان یاغیشلارین سبب اولدوغو داشقینلاردا 10 نفر اؤلوب
داشقینلاردا ایندییهدک 10 نفرین حیاتینی ایتیردیگی، ایتکین دوشن 21 نفرین آختاریش-خیلاص ائتمه ایشلرینین داوام ائتدیگی بیلدیریلیب
برزیلده گوجلو یاغیشلارین سبب اولدوغو داشقینلاردا ایلکین معلوماتلارا گؤره 10 نفر اؤلوب، 21 نفر ایتکین دوشوب. اؤلکهنین گونئییندهکی ریوگرانده دو سول ایالتینده بیر مودتدیر تأثیرلی اولان یاغیشلار داشقینلارا و اینسان تلفاتینا سبب اولوب.
مولکی مودافیعهدن وئریلن آچیقلامادا، داشقینلاردا ایندییهدک 10 نفرین حیاتینی ایتیردیگی، ایتکین دوشن 21 نفرین آختاریش-خیلاص ائتمه ایشلرینین داوام ائتدیگی بیلدیریلیب.
آچیقلامادا ائولرین سو آلتیندا قالماسی سببیندن 1400 نفرین یاشاییش یئرینی ترک ائتمهلی اولدوغو، بؤلگهیه گوجلندیرمه دستهلرینین گؤندریلدیگی بیلدیریلیب.
پرزیدنت لویز ایناسیو لولا دا سیلوانین تاپشیریغینا اساساً، داشقیندان ضرر چکمیش بؤلگهلره اینسانی یاردیم لوازیماتلاری گؤندریلیب.
ایالت والیسی ادواردو لئیته سوسیال مدیا حسابیندان وئردیگی آچیقلامادا بؤلگهده لئیسان یاغیشلارین داوام ائدهجَیینی بیلدیریب و اهالیدن دقتلی اولماغی خواهیش ائدیب.
گوجلو یاغیشلار نتیجهسینده کؤرپولرین داغیلدیغی، ائولرینده قاپالی قالان اینسانلارین داملاردا کؤمک گؤزلدیگی بیلدیریلیر.