آذربایجان جمهوریتی جمهورباشقانی ایلهام علییئوین آوروپا سفری
جمهورباشقانی علییئو، ارمنیستان رهبرلیگینین سیاسی ارک گؤستره‌بیلمه‌سی دوروموندا، ایکی اؤلکه آراسیندا باریش آنلاشماسی ایمضالامانین یاخین واختلاردا مومکون اولاجاغینی بیلدیردی
آذربایجان جمهوریتی جمهورباشقانی ایلهام علییئو ۳۱ آگوست - ۲ سپتامبر ۲۰۲۲.جی ایل تاریخلرینده آوروپا اؤلکه‌لرینه سفر ائتدی. جمهورباشقانی علییئوین آوروپایا سفری بیر نئچه باخیمدان اؤنملیدیر.
۳۱ آگوست ۲۰۲۲ تاریخینده جمهورباشقانی ایلهام علییئو بروکسل‌ده ارمنیستانین باشباخانی نیکول پاشینیان و آوروپا بیرلیگی شوراسی باشقانی شارل میشل ایله اوچلو توپلانتیدا گؤروشدو. گؤروشمه‌ده آذربایجان و ارمنیستان آراسیندا باریش دانیشیقلاری اله آلیندی. دؤرد ساعات داوام ائد‌ن توپلانتینین سونون‌دا لیدئرلر، خاریجی ایشلر باخانلارینین اؤندرلیگینده بیر آی ایچینده ایکیلی باریش دانیشیقلارینین باشلادیلماسی مسقونوسوندا آنلاشدی. جمهورباشقانی علییئو، اگر ارمنیستان رهبرلیگی سیاسی ارک گؤستره‌بیلسه، ایکی اؤلکه آراسیندا باریش آنلاشماسی ایمضالامانین یاخین واختلاردا مومکون اولاجاغینی بیلدیردی. علییئوله پاشینیان نوامبر آییندا یئنیدن گؤروشه‌جک.
۱-۲ سپتامبر ۲۰۲۲ تاریخلرینده ایتالیا جمهورباشقانی سرجو ماتارللانین دعوتی ایله آذربایجان جمهوریتینین جمهورباشقانی ایلهام علییئو ایتالیایا سفر ائتدی. رسمی قارشیلاما مراسیمیندن سونرا جمهورباشقانی ایلهام علییئو، ایتالیا جمهورباشقانی ماتارلا و ایتالیانین باشباخانی ماریو دراگی ایله آیری آیری گؤروشدو. گؤروشمه‌لرده انرژی باشدا اولماقلا ایکیلی امکداشلیق مسئله‌لری موذاکیره ائدیلدی. ایتالیی آذربایجانین آوروپاداکی ان بؤیوک تیجارت اورتاغیدیر.
ایتالیایا سفری چرچیوه‌سینده جمهورباشقانی ایلهام علییئو، آذربایجانین روما ائلچیلیگینین یئنی بیناسینین آچیلیشینی دا ائتدی. سؤزوگئدن بینادا ۲ سپتامبر تاریخینده آذربایجان-ایتالیا اونیوئرسیته‌سینین قوروجو اورتاقلاری آراسیندا ایش‌بیرلیگی انلاشماسی امضالاندی. ایتالیانین ان یاخشی بئش اونیوئرسیته‌سی آذربایجان‌دا اکینچیلیک، ابیلیشیم/انفورماتیک کیمی ساحه‌لرده امکداشلیق ائده‌جک. سؤزون قونوسو اونیوئرسیته‌نین تیکینتیسینین تملی ۲ آوریل ۲۰۲۲.جی ایلده قویولدو و ۲۰۲۴.جو ایلده باشا چاتدیریلماسی گؤزله‌نیلیر. جمهورباشقانی علییئو، ائلچیلیک ترکیبینده آذربایجان مدنیت مرکزینین آچیلماسی ایله باغلی تاپشیریقلار وئردی.
۲ سپتامبردا جمهورباشقانی علییئو ایتالیانین کرنوبیو شهرینده قیرخ سککیزینجیسی تشکیل ائدیلن اولوسلارآراسی فوروما آنا دانیشماچی اولاراق قاتیلدی. جمهورباشقانی علییئو "انرژی گۆونلیگینین تامین ائدیلمه‌سینده آذربایجانین رولو" قونوسوندا دانیشدی. علییئو کرنوببودا آیریجا ایتالیا مطبوعاتینا آیرینتیلی شکیلده آچیقلامالار وئردی.
*
قاراباغ سورونو حل ائدیلدیکدن سونرا گونئی قافقازین اولوسلارآراسی ساحه‌ده‌کی رولو داها دا آرتدی. آذربایجان ترانزیت اؤلکه اولاراق هم دوغو هم ده باتی اؤلکه‌لرینین ایلگیسینی چکیر. ۱۸ جولای ۲۰۲۲ده آذربایجان آوروپا بیرلیگی اؤلکه‌لرینه انرژی صادراتینی ایکی قات آرتیراجاق یئنی آنلاشما ایمضالامیشدی. آذربایجان، آوروپا اؤلکه‌لری آراسیندا ان چوخ ایتالیا ایله یاخین امکداشلیق ائدیر. باکی و روما، گۆونلیک و ساوونما صنایعی ساحه‌سینده ایش‌بیرلیگی ایچینده.
آذربایجان‌دا چوخ ساییدا ایتالیا شیرکتی فعالیت گؤستریر. آذربایجان، انرژی قایناقلارینی آوروپا اؤلکه‌لرینه صادر ائتمه‌گی ایکی قاتینا چیخارماغی هدفلرکن، ایتالیانی بؤلگه‌ده‌کی داغیتیم مرکزی اولاراق گؤرور. ایتالیا، قاراباغین آبادلیغی مسئله‌سینده ده آکتیو رول اویناییر.
قیساجا، آذربایجان جمهورباشقانی ایلهام علییئوین آوروپایا سفری، هم ارمنیستانلا باریش آنلاشماسینین ایمضالانماسی هم آوروپا اؤلکه‌لری ایله ایش‌بیرلیگینین گۆجلنمه‌سی باخیمیندان فایدالی اولموشدور.
