سهند؛ دده قوجاغیندا آغلاییب یوخلایان دده شاعیر - ابراهیم ساوالان
سهندین یازیلاریندا اولان "من" سادهجه بیر شخصی یوخ، میلیونلار "منی" عکس ائتدیریر
مدرنیتهنین دمیر قفسیندن اوسانیب جانا گلن آوروپا شاعیری، بعضن اؤزونو رومانین احتیشاملی گونلرینه آتیب اوردا قلینج ووروب آت اوینادار، بعضن آتئنا سکیلرینده اوتوروب فلسفه توخویوب سؤز گولشدیرر، بعضن ده مقدس کیتابین ورقلرینده، سینا داغینین اتگینده دولانیب سارماشیق کیمی خاچا ساریلار. درد سادهجه مدرنیته دردی اولسا چکمهیه نه وارکی؟
شاعیر سهندین دردی دیلینه وورولموش شوونیسم قاداغاسی ایدی. دوداغیندا قیفیل، الینده زنجیر واریدی. بو درد اؤنونده سهند داغی اولماقدان باشقا چارهسی یوخ ایدی. او دا آوروپا شاعیری کیمی قدیملره سیغیندی. اؤزونو ددهقورقود کیتابینین ورقلرینده اوخودوغو احتیشاملی گونلره آتیب او شانلی ددهنین قوجاغیندا دردلی بیر اوشاق کیمی آغلاماق ایستهدی. شئعرلرینی ددهقورقود کیتابینا باغلادی. او اؤزونو ددهقورقود یئرینه قویوب اونون گؤزویله اوغوز ائللرینین بوگونکو دورومونا باخیب بالالارینی پیس گونده گؤرن بیر آتا کیمی آغلادی.
سهندین شئعری بیر شاعیرین شخصی دویغولاری دئییل بیر خالقین طالئعیدیر. محض بونا گؤره، سهند یاشادیغی اجتماعی شراییطی، منیمسهین هر آدام، اؤزونو او شئعرلرده تاپار. او شئعرلر دامجی-دامجی اونون ایدراکینا دامار. سهندین شهرداشی باریشماز بو دورومو بئله آچیقلاییر: «من سهندی گؤرمهمیشم، گؤرسم ده سهند اولان شراییطده بوی آتمیشام. ایشلتدیگی دئییملرین، کلمهلرین داماریندا دولانمیشام. او سؤزلرین آجیلیغین، شیرینلیگین، اؤتکملیگین، آغیرلیغین، درینلیگین بیرر-بیرر سینامیشام. او سؤزلرله کؤورلمیشم، قوورولموشام، داشلانمیشام. من اونلارین اتگینده یاشلانمیشام، قوجالمیشام.»
سهندین یازیلاریندا اولان "من" سادهجه بیر شخصی یوخ، میلیونلار "منی" عکس ائتدیریر:
من تک اؤزوم دئییلم
خلقیمین ائللریمین
نبضی من ایله وورور.
هر قلبیم چیرپینارکن
کؤکسومده بیر اورک یوخ
میلیون اورک چیرپینیر.
من او کپهنهیم کی،
دونیادا حایات آدلی
شعلهیه وورولموشام.
یانسام دا باکیم یوخدور
ازلدن بو سئودادا
یانماغا دوغولموشام.
البت سهند اوخوجولارینا دیزلرینی قوجاقلاییب اوتورماغی تکلیف ائتمیر، اونلارا اومودلو بیر گلهجهیی موشتولوق وئریر:
سحری آختاران گئجهدن قورخماز،
آلیرام الیمه تلاش عصاسین
اگر گؤیدن یئره قطران یاغسا دا
اوزوب کئچمهلییم ظولمت دریاسین!
ایلگیلیلی خبرلر
آماسرایا می آییندا 4 میندن چوخ کروز یولچوسو گلیب
روسیهنین سوچی شهریندن یولا دوشن "آستوریا گرانده" آدلی کروز گمیسی آماسرا لیمانیندا دمیر سالیب