زاخارووا ایسرائیلین رفح شهرینه قارشی سون هوجوملارینا توخونوب

روسیه‌ بَیان ائدیب کی، ایسرائیلین غزه زولاغینین گونئیینده‌کی رفح شهرینه هوجوملاری ایله باغلی اولوسلارآراسی حوقوقا رعایت ائدیلمه‌لیدیر.

روسیه‌ خاریجی ایشلر ناظیرلیگینین سؤزچوسو ماریا زاخارووا پایتخات مسکودا کئچیردیگی هفته‌لیک مطبوعات کنفرانسیندا ایسرائیلین رفح شهرینه قارشی سون هوجوملارینا توخونوب.

رفحده تخمینا 1.5 میلیون فیلیسطین وطنداشینین اولدوغونو بیلدیرن زاخارووا، "بو چرچیوه‌ده اولوسلارآراسی اینسانی حوقوقون مدعالارینا عمل اولونماسینی ایستَییریک" دئدی.

ایسرائیل و حماس آراسیندا اسیر موبادیله‌سی ایله باغلی بیر نئچه دفعه دانیشیقلار آپاریلدیغینی، لاکین بو دانیشیقلارین هئچ بیر نتیجه وئرمدیگینه دقت چکن زاخارووا، "وضعیت اؤلکه‌میزین مؤقعیینی تصدیقلَییر کی، بؤحرانین سویه‌سینین آزالدیلماسی تشبوثلری ایله بیرلیکده نهایی دورومون معین ائدیلمه‌سی اوچون فیلیسطین‌لیلر ایله ایسرائیللیلر آراسیندا بیرباشا دیالوگا شرایط یارادیلماسینا احتیاج وار." دئدی.

زاخارووا "بو دیالوگ نتیجه‌سینده 1967-جی ایل سرحدلرینده پایتخاتی دوغو قدس اولماقلا، ایسرائیلله صولح و تهلوکه‌سیزلیک ایچینده بیرلیکده یاشایان مستقیل فیلیسطین دؤولتی قورولمالیدیر." وورغولاییب.