بورل: غزه‌‌ده آجلیق چوخالیب

اوروپا بیرلیگینین خاریجی علاقه‌لر و تهلوکه‌سیزلیک سیاستی اوزره عالی نوماینده‌سی جوزپ بورل غزه‌نین قوزئیینده باشلایان آجلیغین گونئیه دوغرو گئتدیگینی ایفاده ائده‌رک، «تعجیلی اینسانی آتیش‌کس» چاغیریب.

جوزپ بورل، اؤز سوسیال مدیا حسابیندان وئردیگی آچیقلاماسیندا، "بیرلشمیش میللتلر تشکیلاتینین عموم‌دونیا ارزاق پروگرامینین ایجراچی دیرئکتورو سیندی مک‌کینین سؤزلرینه گؤره، چوخ قورخدوغوموز سناریو گئرچکلشیب. غزه‌نین قوزئیینده تام آجلیق وار، گونئیه دوغرو ایرلیلَییر." دئدی.

بیرلشمیش میللتلر تشکیلاتینین تهلوکه‌سیزلیک شوراسینین 2728 سایلی قطعنامه‌سینین تام و درحال یئرینه یئتیریلمه‌سی لازیم اولدوغونو وورغولایان بورل، "اسیرلرین آزاد ائدیلمه‌سی و آجلیق چکنلره یاردیملارین وئریلمه‌سی اوچون تعجیلی آتیش‌کس لازیمدیر" چاغریشی ائدیب.

ایسرائیلین "گئنیش میقیاسدا اینسانی یاردیملارا تام، تهلوکه‌سیز، سورعتلی و مانعسیز چیخیشی تامین ائتمک عهده‌لیگی اولدوغونو" خاطیرلادان بورل، "حماس و ایسلامی جهادین کرم شالوم بؤلگه‌سینه قارشی راکت یاغدیریشینی آچیق شکیلده قیناییریق"، آچیقلاماسینی وئریب.

ایسرائیلین اکتبرین 7-دن بری داوام ائدن هوجوملاری سببیندن تخمینا 2.3 میلیون اهالیسی اولان غزه زولاغیندا 1.9 میلیون اینسان دیدرگین دوشوب. بو فیلیسطین‌لیلرین بیر چوخو ایسرائیلین داها اول «تهلوکه‌سیز بؤلگه» اعلان ائتدیگی گونئیده‌کی رفح شهرینه سیغینیب.

ایسرائیل اوردوسو تئز-تئز هاوا ضربه‌لری ائندیردیگی رفح شهرینه قورودان هوجوما کئچرسه‌، غزه زولاغیندا مولکی اهالینین سیغیناجاق تاپمایاجاغی ایله باغلی ناراحاتلیقلار اولسا دا، اولوسلارآراسی توپلومون خبردارلیغینا باخمایاراق، ایسرائیل حاکیمییتی رفح شهرینی ایشغال ائتمکله تهدیدلرینه داوام ائدیر.

ایسرائیل دؤولت تلویزیونو کان-ین خبرینده ایسرائیل اوردوسونون رفحین دوغوسوندا ایسرائیل سرحدینه یاخین بیر چوخ محله‌نی بوشالتماغا باشلادیغی آچیقلانیب.