آمریکا واگنری سوچ هؤرگوتو اعلان ائتدی

آمریکا بیرلشمیش دؤولتلری روسیانین موزدلو عسگر قروپو واگنری اولوسلارآراسی سوچ هؤرگوتو اعلان ائتدی.

آمریکا بیرلشمیش دؤولتلری مالیه باخانلیغی و خاریجی ایشلر باخانلیغی یئنی تحریم قرارلارینی آچیقلادی.

قرارلا، اولوسلارآراسی سوچ هؤرگوتو اعلان ائدیله‌ن واگنر قروپو ایله باغلانتیلی شخص و قورولوشلار، تحریم لیستینه آلیندی. واگنر، روسیانین اوکرایناداکی ساواشینا یاردیم ائتمکله اتهام اولونور.

مالیه باخانلیغی، واگنره، مولکی شخصلرین هدف آلینماسیندان مسئول اولدوغو و یا سوچ اورتاقلیغی ائتدیگی اوچون علاوه تحریملر تطبیق ائتدیگینی اعلان ائتدی.

هاوا یولو شیرکتی گرین لایت مسکو ایسه، واگنر قروپو طرفین‌دن جبهه‌یه عسگر داشینمادا ترجیح ائدیلدیگی اوچون لیسته آلیندی.

واگنر قروپونون اؤزللیکله آفریقا قاره‌سین‌ده ائتکیلی اولماسینی هدفله‌یه‌ن قورولوشلار دا تحریم لیستینه داخیل ائدیلدی.

آفریقا پولیتولوژی آدلی سیاست حاضرلایان قروپ ایسه باتیلی اؤلکه‌لرین آفریقانی ترک ائتمه‌لری اوچون استراتژیلر و مکانیزملر حاضیرلادیغی اوچون لیستده یئر آلیر.

مالیه باخانی جنت یلن، تحریملرین روسیانین ساواش ماشینینی دستکله‌مه قابیلیتینی اؤنله‌یه‌جگینی ایفاده ائتدی.