بروکسلده "داها عدالتلی بیر دونیا مومکوندور" آدلی پانل تشکیل ائدیلدی
متخصصلر، جمهورباشقانی رجب طیب اردوغانین "داها عدالتلی بیر دونیا مومکوندور" کیتابیندا دقته چاتدیردیغی دوشونجهلر اطرافیندا فیکیر آلیش وئریشی ائتدیلر
تورکیه جمهورباشقانلیغی ایلهتیشیم باشقانلیغی، بلژیکنین باشکندی بروکسلده آوروپا پارلمانیندا "داها عدالتلی بیر دونیا مومکوندور" آدلی پانل تشکیل ائتدی.
بیرلشمیش میللتلر تشکیلاتینین قورولوشوندا اولان چاتیشمازلیقلارین و اونلارین آرادان قالدیریلماسی اوچون ضروری اصلاحاتلارین موذاکیره ائدیلدیگی پانلده آوروپانین موختلیف اؤلکهلریندن اولان متخصصلر داها ایلکهلی، قابساملی، استراتژیک و تطبیق اولونابیلهن مدل اوچون اؤز گؤروشلرینی سوندو.
آوروپا بیرلیگنین ایلهتیشیم و خالقلا ایلیشکیلر مشاور جوانا ماگدالنانین مسونوجولوغوندا متخصصلر مؤوجود قورولوشون یئنی تهدیدلره یئترلی حل یوللاری سوناجاق وضعیتده اولمادیغینی موذاکیره ائدرک، جمهورباشقانی رجب طیب اردوغانین "داها عدالتلی بیر دونیا مومکوندور" کیتابیندا دقته چاتدیردیغی دوشونجهلر اطرافیندا فیکیر آلیش وئریشی ائتدیلر.
"ترت وورلد" کانالینین خاریجی سیاست متخصصی یوسف اریم، بیرلشمیش میللتلرین حاضیرکی قورولوشو ایله سیغینماچیلار، ترور و ایقلیم دییشیکلیگی کیمی قلوبال پروبلئملرله مشغول اولماق اوچون یئترلی اولمادیغینا دقت چکدی.
اریم، آفریقا و گونئی آمریکانین بیرلشمیش میللتلر امنیت شوراسیندا دائمی نمایندهلیگینه احتیاج اولدوغونو وورغولادی.
آوروپا پارلمانینین سیاست و استراتژیک ایلهتیشیم مشاوری ایپک تکدمیر ده آوروپابیرلیگینین دونیا نظامینی داها عدالتلی قیلماق اوچون آتاجاغی آددیملار حاقیندا فیکیرلرینی سوندو.
آوروپا محافظهکارلار و اصلاحاتچیلار پارتیسینین گئچمیش باش مودورو ریچارد میلسوم دا ۷۰ ایللیک دونیا نظامینین یئنی تهلوکهلره حل یوللاری تاپماق اوچون کیفایت ائتمهدیگینی وورغولادی.
دوشونجه قورولوشو آوروپا قونشولوق شوراسی مودورو ساموئل دوری وستربی، تورک دؤولتلری تشکیلاتی کیمی یئنی قوروملارین بو معنادا اؤنمیندن دانیشدی.
ناتو و دوشونجه قورولوشلاری اوچون استراتژیک آنالیست و سیاست مشاویری موریزو گری ایسه، امنیت شوراسیندا سسلرین چوخلوغونا قارشی وتو قونوسونونف دموکراتیک قورولوشا اویغون گلمهیهن و اسکی بیر بیر آنلاییش اولدوغونو بیلدیردی.