قسام توغایلاری ایسرائیل عسگرلری ایله توققوشوب
قسام توغایلاری، قودس فوغایلاری ایله بیرگه غزه زولاغینین قوزئیینده یئرلشن جبالیا قاچقینلار دوشرگهسینده ایسرائیل اوردوسونا هوجوملار تشکیل ائتدیگی بیلدیریلیب
فیلیسطینین مقاومت حرکاتی حماس-این حربی قانادی عزالدین قسام توغایلاری غزه زولاغیندا باش وئرن قارشیدورمالاردا چوخلو ایسرائیل عسگرینی اؤلدوردوکلرینی و ایسرائیل اوردوسونا مخصوص ماشینلاری محو ائتدیکلرینی آچیقلاییبلار.
قسام توغایلارینین تلگرام حسابیندان ائدیلن یازیلی آچیقلامادا ایسلامی جهادین حربی قانادی قودس فوغایلاری ایله بیرگه غزه زولاغینین قوزئیینده یئرلشن جبالیا قاچقینلار دوشرگهسینده ایسرائیل اوردوسونا هوجوملار تشکیل ائتدیگی بیلدیریلیب.
جبالیا دوشرگهسیندهکی شهید عماد عقل مسجیدینین آرخاسیندا یئرلشن ایسرائیل عسگرلری ایله فیلیسطین مقاومت دؤیوشچولرینین توققوشدوغو، ایسرائیل عسگرلری آراسیندا اؤلن و یارالانانلارین اولدوغو قید ائدیلیب.
الآلبانی کوچهسینده باش وئرن قارشیدورمادا ایسرائیل عسگرلرینین هلاک اولدوغو، الاکارمه کوچهسینده ایسه ایسرائیل اوردوسونا مخصوص «مرکاوا» تیپلی تانکین پارتلادیلدیغی بیلدیریلیب.
قسام توغایلاریندان جبالیا دوشرگهسینین دوغوسوندا ایسرائیل اوردوسونا عاید ایکی تانکین، دوشرگهنین قوزئییندهکی ایسرائیل اوردوسونا عاید بؤلمهلرین ایسه «یاسین-105» راکتلری ایله هدف آلیندیغینی گؤسترن گؤرونتولر پایلاشیلیب.
غزه شهرینین تل الهوا بؤلگهسینین گونئییندهکی نتساریم دهلیزینده بیر ایسرائیل عسگرینین اسنایپر هوجومو ایله هدف آلیندیغی، ایسرائیلین جنوبونداکی سدروت شهرینده ایسه راکت هوجوملارینین حیاتا کئچیریلدیگی بیلدیریلیب.
بیلدیریلیب کی، غزه زولاغینین گونئییندهکی رفح شهرینده رفح سرحد قاپیسیندا ایسرائیل عسگرلرینه قارشی قومپارا آتانلارلا هوجوملار تشکیل ائدیلیب.
رفحین دوغوسوندا ایسرائیل عسگرلری و ایسرائیل اوردوسونا عاید ماشینلارین هدفه آلیندیغی دا بیلدیریلیب.
ایسرائیل اوردوسو 6 می تاریخینده وئردیگی آچیقلامادا مجبوری کؤچکون فیلیسطینلیلرین سیغیندیغی رفحین دوغوسونداکی بعضی محلهلرین بوشالدیلماسینی ایستهییب و 7 می تاریخینده سحر ساعاتلاریندا غزهنین رفح بؤلگهسینه قورودان هوجوما کئچدیگینی آچیقلاییب. مصرله سرحد قاپیسینین غزه طرفینی اله کئچیردیگینی بیلدیردی.
ایسرائیل اوردوسونون ایشغال ائتدییی اراضییه مصر سرحددینده غزهیه اینسانی یاردیملارین اساس کئچید منطقهسی و غزه زولاغیندا فیلیسطینلیلرین خاریجه سیاحت ائتمک اوچون ایستیفاده ائتدیگی یگانه کئچید منطقهسی اولان رفح سرحد منطقهسی داخیلدیر.
ایسرائیلین ۷ اکتبردان بری غزه زولاغینا تشکیل ائتدیگی هوجوملاردا ان آز 15 مین 103-او اوشاق، 9 مین 849-او قادین اولماقلا 35 مین 456 فیلیسطینلی هلاک اولوب، 79 مین 476 نفر ایسه یارالانیب.
داغینتیلار آلتیندا هله ده مینلرله اؤلو اولدوغو بیلدیریلیرکن، اینسانلارین سیغیندیغی خستهخانا و تحصیل موسسهلری هدف آلیناراق مولکی آلتیاپی دا محو ائدیلیر.