قسام توغایلاری ایسرائیل اوردوسونو هدف آلیب
حماس: قسام توغایلاری رفح سرحد قاپیسینین دوغوسونا داخیل اولان دوشمن (ایسرائیل) قووهلرینه آغیر چاپلی قمبارا آتانلارلا هوجوم ائدیر
فیلیسطینین موقاویمت حرکاتی حماس-ین حربی قانادی عزالدین قسام توغایلاری، غزه زولاغینین گونئیینده، مصر سرحدیندهکی رفح سرحد قاپیسینین دوغوسونا گیرن ایسرائیل اوردوسو قووهلرینی قمبارا آتانلارلا هدفه آلیب.
قسام توغایلاری ایسرائیل اوردوسونون رفح شهرینه قورودان هوجوما کئچهرک غزهنین مصره گئدن سرحد قاپیسینین فیلیسطین طرفینی اله کئچیردیگینی آچیقلادیقدان سونرا یازیلی آچیقلاما وئریب.
آچیقلامادا، "قسام توغایلاری رفح سرحد قاپیسینین دوغوسونا داخیل اولان دوشمن (ایسرائیل) قووهلرینه آغیر چاپلی قمبارا آتانلارلا هوجوم ائدیر"، بَیاناتی داخیل ائدیلیب.
ایسرائیل اوردوسو بو گون سحر ساعاتلاریندا رفح شهرینه قورودان هوجوما کئچهرک غزهنین مصره آچیلان سرحد قاپیسینین فیلیسطین طرفینی اله کئچیردیگینی آچیقلاییب.
حماس دونن گئجه قطر و مصر طرفیندن ایرهلی سورولن "آتشکس تکلیفلرینی" تصدیقلدیگینی اعلان ائتدیکدن سونرا ایسرائیلین حربی ناظیرلر کابینهسی رفحدهکی هوجوملاری داوام ائتدیرمک قرارینا گلیب.
غزهنین رفح سرحد قاپیسی اینسانی یاردیملارین گیریشی اوچون اساس کئچید منطقهسی و غزه زولاغیندا فیلیسطینلیلرین خاریجه سیاحت ائتمک اوچون ایستیفاده ائتدیکلری یگانه کئچید منطقهسیدیر.
ایسرائیلین 7 اکتبردان بری غزه زولاغینا تشکیل ائتدیگی هوجوملاردا 34 مین 789 فیلیسطینلی حیاتینی ایتیریب، 78 میندن چوخو ایسه یارالانیب.
داغینتیلار آلتیندا هله ده مینلرله اؤلو اولدوغو بیلدیریلرکن، اینسانلارین سیغیندیغی خستهخانا و تحصیل موسسهلری هدف آلیناراق مولکی آلتیاپی دا محو ائدیلیر.