ایسرائیلین غزه زولاغینا هوجوملاری

غزه زولاغینین مرکزی بؤلگه‌سینده یئرلشن نصیرات قاچقینلار دوشرگه‌سینین قوزئیینده یئرلشن مغراقه بؤلگه‌سی و زهرا شهرینه ایسرائیلین هاوا هوجومو نتیجه‌سینده 7 فیلیسطینلی حیاتینی ایتیریب.

غزه‌ده‌کی صحیه منبعلریندن آلینان معلوماتا گؤره، هوجومدان سونرا 7 نفرین جسدی نصیرات قاچقینلار دوشرگه‌سینده‌کی العوده خسته‌خاناسینا آپاریلیب.

مغراقه بؤلگه‌سی و زهرا شهرینه ائدیلن هوجومدا یارالانان 5 فیلیسطینلی ده خسته‌خانایا آپاریلیب.

ایسرائیل اوردوسو غزه زولاغینی یارییا بؤلن اوردو خطی اولان «نتساریم» دهلیزینین گئنیشلندیریلمه‌سی چرچیوه‌سینده زهرا شهری و مغراقه بؤلگه‌سینه هوجوملارینی گوجلندیریب.

بو آرادا ایسرائیل اکتبرین 7-دن بری ایلک دفعه اولاراق غزه زولاغینا اینسانی یاردیمین گیریشینی آرتیرماق اوچون اِرِز سرحد قاپیسینی آچیب.

ایسرائیلین غزه کوردیناسیون و علاقه اداره‌سینین مسئولو سرهنگ موشه تترو، کئچیدین هر گون آچیق اولاجاغینا اومید ائتدیگینی و گونده 500 یاردیم ماشینینین غزه‌یه گیرمه‌سی هدفینه چاتماغا یاردیم ائده‌جَیینی بیلدیریب.