روسیا: ارمنیستان اؤز یانلیشلارینی باشقالارینا یۆکلهمک ایستهییر
"ارمنیستانین طلبلرینه روسیادان بیر تپکی آلابیلمهدیگی اوچون آلتئرناتیو آختارماق مجبوریتینده قالدیغینا دایر سؤزلر، اؤز یانلیشلارینین سوچونو باشقالارینا یۆکلهمه چاباسیندان باشقا بیر شئی دئییل"
روسیا خاریجی ایشلر باخانلیغی سؤزچوسو ماریا زاخارووا، ایروان یؤنهتیمینین ارمنیستانین کولکتیو گوونلیک آندلاشماسی هؤرگوتوندن اولاسی آیریلیشی قونوسوندا باشلاتدیغی جَدلین آماجینین، اؤز یانلیشلارینین مسئولیتینی باشقالارینا یۆکلهمک اولدوغونو سؤیلهدی.
زاخارووا، "ارمنیستانین گویا طلبلرینه روسیادان بیر تپکی آلابیلمهدیگی اوچون آلتئرناتیو آختارماق مجبوریتینده قالدیغینا دایر سؤزلر منجه اؤز مسئولیتینی اۆستوندن آتما، اؤز یانلیشلارینین سوچونو باشقالارینا یۆکلهمه چاباسیندان باشقا بیر شئی دئییل" دئیه دانیشدی.
سؤزچو آیریجا، "ایروان یؤنهتیمینین ارمنیستانین خاریجی سیاست خطینی چئشیدلندیرمهیه باغلی آچیقلامالارینی محور دییشمهسی دیشیندا بیر شئیله آچیقلایابیلمهم. بو قونویا دایر یالنیز آچیقلامالار ائشیتمک دئییل، ایشلرین عملده نئجه شکیللنهجگینی گؤرمک ایستهیریک" دئیه دانیشدی.
زاخارووایا گؤره ارمنی مقاملار بو ایفادلری ایله "گئرچک نیتلرینی گیزلتمهگه" چالیشیر. اماجلاری ایسه اؤلکهنین خاریجی سیاستینی کؤکلو بیر شکیلده دییشدیرمکدیر. زاخارووایا گؤره ایروان بو سیاستی باتینین یؤنلندیرمهسی ایله سئچدی.
ارمنیستان باشباخانی نیکول پاشینیان کولکتیو گوونلیک آندلاشماسی هؤرگوتونون ۲۳ نوامبردا مینسکده تشکیل ائدیلهجک ذیروهسینه قاتیلمایاجاغینی بیلدیرمیشدی. آیریجا آمریکا مطبوعاتینا وئردیگی مصاحیبهده پاشینیان، قاراباغ حادثهلرینین ایروانی گوونلیک ساحهسینده ایلیشکیلرینی چئشیدلندیرمهیه مجبور ائتدیگینی سؤیلهمیشدی.