اورتا دوغو بحرانی: اؤلنلرین ساییسی گونجللندی
اسرائیل ساغلیق باخانی موشه آربل، فضیح بیر آچیقلامایلا، اسرائیله سالدیری تشکیل ائدرکهن یارالی حالدا اله گئچریلهن فلسطینلیلرین معالیجهسینین ائدیلمهیهجگینی بیلدیردی
اسرائیلین ۷ اکتبردان بو یانا غزه زولاغینا/یولاغینا تشکیل ائتدیگی سالدیریلاردا اؤلنلرین ساییسیسی ۱۳۵۴ نفره یوکسلدی.
فلسطین ساغلیق باخانلیقیندان وئریلهن یازیلی آچیقلامادا، اسرائیلین غزهیه تشکیل ائتدیگی سالدیریلاردا ۱۳۵۴ نفرین حیاتینی ایتیردیگی، ۶ مین ۴۹ نفرین یارالاندیغی بیلدیریلدی.
غزهدهکی ساغلیق باخانی وکیلی دکتر یوسف ابو الریش، وفات ائدنلر و یارالانانلارین بؤیوک اکثریتینی اوشاق، قادین و یاشلیلارین اولوشدوردوغونو قید ائتدی.
ساغلیق باخانلیغی سؤزچوسو اشرف القدره ایسه،
"خستهخانالار تام توتوملا چالیشیر. اسرائیل سالدیریلارینین آرتماسی و یارانان قالابالیقدان اؤترو یارالی و خستهلر یئرده یاتیر" ایفادهلرینی ایشلتدی.
سؤزچو القدره آیریجا، اسرائیلین داوام ائدن الکتریک، سو و یاناجاق کسیلمهسینین، یارالی و خستهلرین حیاتلارینی تهدید ائتدیگینی، "قورخونج بیر ساغلیق و چئوره فلاکتینه سبب اولدوغونو" وورغولادی.
فلسطین ساغلیق باخانی می الکیله ده، اسرائیل بومباردمانی آلتینداکی غزه زولاغیندا خستهخانالاردا طبی لوازیمده جدی پروبلئم یاشاندیغینی ایفاده ائدرک، ساغلیق سیستمینین چؤکهبیلهجگی اویاریسینی دیله گتیردی و عاجیل دستک طلب ائتدی.
اولوسلارآراسی قیزیل خاچ کومیتهسی اورتا دوغو مودورو سؤزچوسو ایمانه طرابلسی ده، غزهده، اینسانی وضعیتین قایغی وئریجی و تهلوکهلی شکیلده پیسلشدیگینی، ساغلیق بؤلومونون ده چؤکوشده اولدوغونو سؤیلهدی.
اسرائیل ساغلیق باخانی موشه آربل ایسه، فضیح بیر آچیقلامایلا، اسرائیله سالدیری تشکیل ائدرکهن یارالی حالدا اله گئچریلهن فلسطینلیلرین معالیجهسینین ائدیلمهیهجگینی بیلدیردی.
یدیعوت آحارونوت قزئتینین خبرینه گؤره، ساغلیق باخانی آربل، دونن باشباخان بنیامین نتانیاهویا یازدیغی مکتوبوندا، سالدیریلاردا یارالانان حماسلیلارین دؤولت خستهخانالاریندا معالیجهلرینین دوردورولماسی امرینی وئردیگینی آچیقلادی.
مکتوبوندا، "ساغلیق سیستمی بو چتین زامانلاردا اسرائیل عسگرلرینین معالیجهسینه و گلهجک اولانا حاضرلیقلی اولماغا متمرکز اولمالیدیر" دئیهن آربل، اؤز ادارهسی آلتینداکی توپلوم ساغلیغی سیستمینین، حماسلیلاری معالیجه ائتمهیهجگینی بیلدیردی.
اسرائیل دؤولت تلویزیونو کان، حماسین سلاحلی قانادی عزالدین القسام توغایلارینین محاصره آلتینداکی غزه زولاغیندان اسرائیله باشلاتدیغی "اقصی توفانی" سالدیریسیندا اؤلو ساییسینین ۱۳۰۰ نفره یوکسلدیگینی ایفاده ائتدی.
دؤولت تلویزیونو، سالدیریلاردا یارالانان اسرائیللی ساییسینی دا ۳۵۰سی آغیر اولماق اوزره ۳ مین ۳۰۰ اولاراق آچیقلادی.
اسرائیل اوردوسوندان وئریلهن آچیقلامادا دا، ۷ اکتبردان بو یانا اؤلدورولهن عسگرلرینین ساییسینین ۲۲۰ اولدوغو بیلدیریلدی.
آچیقلامادا، اؤلدورولهن ۳۱ عسگرین داها کیملیگینین آچیقلانماسینا ایجازه وئریلدیگی و عسگرلرین عائلهلرینین بیلگیلندیریلدیگی ایفاده ائدیلدی.
حماسین عسگری قانادی قسام توغایلاری، جمعهائرتهسی گونو اسرائیله "الاقصی توفانی" آدلی احاطهلی بیر سالدیری باشلاتدیغینی بیلدیرمیشدی. غزهدن اسرائیله مینلرجه راکت آتیلارکهن سلاحلی قروپلار دا بؤلگهدهکی یئرلهشیم یئرلرینه گیرمیشدی.
اسرائیل اوردوسو دا ساواش اوچاقلاری ایله غزهیه دمیر قیلینجلار عملیاتی باشلاتدیغینی آچیقلامیشدی.