Demokratiya sağında soñğı kön
Törkiyä külämendä “Fätullahçı” (FETÖ/PDY) terror oyışması/parallel däwlät qorılışınıñ 15nçe iyül’däge uñışsız tüntäreleş kereşüenä reakśiya kürsätü öçen ütkärelgän demokratiya näwbäteneñ soñğı könendä dä mäydannar xalıq belän şığrım tulı buldı.
İstanbulda Taksim mäydanında kiçke säğätlärdä cıyıla başlağan meñnärçä watandaş yañğırağan marşqa häm cırlarğa quşıldı.
Törkiyä bayraqları belän ber rättän Azärbaycan häm Fälästin bayraqları da celferdäwçe uram cıyınında xalıq "Keşe şikelle keşeneñ êzennän”, “Qaharman köräşçelär”, “Mäğrur tor, başıñnı iymä” häm “Räcäp Tayyip Ärdoğan” yazuların kütärde.
Üsküdar Kısıklıda da İlbaşı Räcäp Tayyip Ärdoğan torağınıñ aldında cıyılğan watandaşlar törle şiğarlär belderep, täqbir äytte.
İzmirdä Konak mäydanında "demokratiya sağı”nda bulğan watandaşlar näwbätneñ soñğı könendä dä mäydannı tutırdı.
27 kön buyı mäydannı buş qaldırmağan watandaşlar qullarındağı Törkiyä bayraqları belän şiğarlär äytep, tüntäreleş kereşüen yasawçılarğa rizasızlıqların citkerde.
“Aq” partiyanıñ İzmir vilayäte citäkçelege demokratiya näwbäte başlağan könnän birle mäydannardağı xalıqnıñ toyğıların yazğan 11 xatirä däftäre İlbaşı Räcäp Tayyip Ärdoğanğa cibäreläçäk.
Biläciktä meñnärçä keşe qullarında Törkiyä bayraqları belän Cömhüriyät mäydanında cıyıldı. Mäydandağılar urnaştırılğan däw êkran aşa Premyer-ministr Binali Yıldırım häm İlbaşı Räcäp Tayyip Ärdoğannıñ Bäştäpä İlbaşı qolliyäse baqçasınnan xalıqqa yasağan möräcäğäten tıñladı.
Zonguldakta da şaxtyor häykäle mäydanındağı programmada Törkiyä bayraqların häm yazularnı kütärep cıyılğan watandaşlar "Mäğrur tor, başıñnı iymä, bu millät sineñ belän" şiğarlären äytte.
Diyarbakır, Älazığ, Batman, Mardin, Siirt häm Bingöldä “Fätullahçı” terror oyışmasınıñ tüntäreleş kereşüenä reakśiya belderüçe watandaşlar "demokratiya näwbäte”neñ soñğı könendä mäydannarda cıyıldı.
Kördçä mäwlid uqıldı. “PKK” terror oyışmasınıñ Sur belän Mardinnıñ Kızıltäpä ilçäsendäge höcümnärenä rizasızlıq belderelde.
Kırklarälindä Vilayät mäydanında cıyılğan xalıq qullarında Törkiyä bayraqları belän törle şiğarlär äytep, tüntäreleş kereşüenä reakśiya kürsätte.
Çigännärdän torğan “Mähtär taqımı” ansamble üz tamaşasın täqdim itte.
Hakkaridä vilayät idaräse yanında cıyılğan watandaşlar 15nçe iyül’däge tüntäreleş kereşüendä şähit buluçılar öçen doğa qıldı.
Waqıt waqıt şiğarlär äytüçe xalıq mäydanda urnaştırılğan däw êkran aşa tüntäreleş kereşüe tönendä yäşängännärne qaradı.
Watandaşlar İlbaşı Ärdoğan uqığan şiğirlärne dä tıñladı.
