Ärdoğan yäş'lär belän oçraştı

Törkiyä ilbaşı Räcäp Tayyip Ärdoğan 19nçı may - Atatörekne iskä alu, yäş’lär häm sport bäyräme uñayınnan İstanbulda yäş’lär belän oçraştı. Anda ul fändä, sänğat’tä, mediada, soñğı çorda bigräk tä sportta yäş’lärneñ tağın da kübräk alğı planğa çığa başlawın xäterlätte.

“Äle 21 yäşendä genä buluına qaramastan, İstanbulnı yawlap alıp yaña çornı açıp iskesen yapqan Fatix soltan Mäxmät şikelle yäş’lär tarix buyı xalqıbıznı ciñüdän- ciñügä, uñıştan - uñışqa alıp bardı. Ğazıy Mostafa Kämalnıñ 19nçı mayda qabızğan bäysezlek fakelı yäş’lärneñ cilkälärendä böten Anadoluğa tarala, barlıq yöräklärne biläp ala, şul uq yäş’lärneñ fidaqar’lege belän ciñügä iltä”,-dip söyläde Ärdoğan.

İlbaşı yäş’lärneñ bügen här tarmaqta alğı saflarda wazıyfa başqaruına tuqtaldı. “İminlek tarmağında êşläwçe poliśiyä häm jandarmeriyä xezmätkärläreneñ kübese sezneñ yäş’lärdägelär. Saqlanu sänäğatendä bik küp proyektnıñ astında yäş’ injenerlarıbıznıñ imzası häm tırışlığı bar”,-dip söyläde ul.  

İlbaşı soñğı yıllarda yäş’lär öçen investiśiyälär yasaluına da basım yasadı. “Millätebezneñ iñ zur ömete - sez”,-dide ul.

Ärdoğan sport tarmağında ireşelgän uñışlarnı da xäterlätte. Ul 2024nçe yılğı Olimpiya uyınnarında da yaña yoldızlar päyda bulaçağına ışanuın citkerde.