"Togg" Germaniyädä satuğa çığaçaq
Sänäğat’ häm texnologiyä ministrı Mäxmät Fatix Kacır "Togg" avtomobile belän bäyle belderülär yasadı
Törkiyäneñ cirle häm milli êlektrlı avtomobile “Togg” 2025nçe yıl başında Awrupa bazarına keräçäk. Sänäğat’ häm texnologiyä ministrı Mäxmät Fatix Kacır Törkiyä radio häm televideniye kompaniyäsenä (TRT) bu xaqta belderülär yasadı.
Ul cirle avtomobil’ “Togg”nıñ barı yaña maşina markası tügel, barlıq tarmaqnı üzgärtüdä başlap yörüçe marka buluın asszıqıladı. Kacır yullardağı “Togg” sanınıñ 30 meñgä yaqınlaşuın belderde.
Ministr avtomobil’neñ 2025nçe yıl başında Germaniyädä satuğa çığaçağın häm, şulay itep, Awrupa bazarına keräçägen citkerde.
“Uzğan aylarda AQŞnıñ Las-Vegas şähärendä tanıtılğan “Togg”nıñ “Fastbêk” modeleneñ dä şul uq çorda bazarğa çığuı kötelä. Kiläse çorda “Togg”nıñ yaña alğarışları bulaçaq”,-dip söyläde Kacır.
Ministr “Togg”nıñ programmasın yanartunıñ da däwam itüen söyläde. Axırğı yañalıqlardan berse - yöz tanu funkśiyäse.
Kacır äytüençä, tizdän Törkiyä ilbaşı Räcäp Tayyip Ärdoğan dön’yağa yaña texnologik stimul programması iğ’lan itäçäk.
