“Tabii” barı "TRT"neñ proyektı ğına tügel, Törkiyä Cömhüriyäteneke"

“TRT” teleradiokompaniyäse üzeneñ seriallarına xalıqara sorawnı qanäğat’länderü häm üzgärgän tamaşa qılu ğadätlärenä yaraqlaşu öçen “Tabii” sanlı platformasın tormışqa aşırdı. Ul 1 yıllığın 4 millionnan artıq äbünäçe belän bilgeläp ütä.  

“Bezne berläşterüçe xikäyälär” şiğare belän başlanıp kitkän platformada suğış fil’mnarı da, romantik komediyälär dä, detektivlar da, yäş’lär komediyäläre dä qararğa bula. Ul tamaşaçılarğa här yäş’kä häm här zäwıqqa turı kilüçe êçtälekne täq’dim itä.

Törkiyä radio häm televideniye kompaniyäse (TRT) ğomum mödire professor Mäxmät Zahid Sobacı “Tabii”nıñ 1 yıllığı uñayınnan yasağan belderüendä bolay di: “Tabii” barı TRTneñ proyektı ğına tügel, Törkiyä Cömhüriyäteneke. Anıñ bik ähämiyätle tağın ber üzençälege isä barlıq programma häm texnik asqormasınıñ cirle häm milli buluı”.

Sobacı sanlı platformalarnıñ kübräk Könbatışta çığarıluın häm alarnıñ tamaşaçılarğa qotılğısız räweştä üz yoğıntıların yasawın äytä. “Bu yoğıntığa qarşı al’ternativasız qalğan, üzläre dä belmiçä mädäni cimerelügä duçar itelgän tamaşaçılarğa üzençälekle häm çista êçtälekle tapşırular täq’dim itäbez. Yıllar buyı berdänber çığanaqtan tuqlanğan tapşıru dön’yasında hiç xisapqa alınmağan 5 milliard keşegä xikäyälären añlata aluçı platforma biräbez”.  

“Tabii” da 30dan artıq original’ tapşıru häm 20 meñ säğat’tän kübräk kontent bar. Alar 5 teldä: törekçä, inglizçä, ispança, ğaräpçä häm urduça täq’dim itelä.  

Zahid Sobacı “Tabii”dağı yaña proyektlar xaqında da söyläde.

“Bezneñ maqsatıbız böten dön’yağa kürsätü. Bu mäğ’nädä “Tabii” tizdän xalıqara açılışın yasayaçaq häm dön’yada Törkiyä fil’mnarına sorawnı qanäğat’länderü noqtasındağı ähämiyätle buşlıqnı tutıraçaq. Platforma kiläse sezonnan başlap 3 yıl buyı “TRT 1” häm “TRT Sport” kanalları belän bergä UEFA Çempionnar ligası, UEFA Awrupa ligası häm UEFA Konferenśiyä ligası matçların da kürsätäçäk”,-dide Törkiyä radio häm televideniye kompaniyäse (TRT) ğomum mödire professor Mäxmät Zahid Sobacı.