Ministr Fidan - Blinken söyläşüe uzdı

Törkiyäneñ tışqı êşlär ministrı Xakan Fidan Ğazzägä höcümnärneñ tuqtawı öçen Amerika Quşma Ştatların İzrail östendäge yoğıntısın qullanırğa çaqırdı.

Diplomatik çığanaqlardan alınğan mäğlümatqa kürä ministr Fidan AQŞ däwlät särqätibe Êntoni Blinken belän telefonnan söyläşte.

AQŞ tarafınıñ taläbennän soñ ütkärelgän söyläşüdä ike il arasındağı mönäsäbätlär belän ber rättän regional’ häm global’ mäs’älälär quzğatıldı.

Söyläşüdä AQŞ-Törkiyä mönäsäbätlärendä berlektäşlek ruxına yaraqlı totışnıñ ähämiyäte assızıqlandı, Şveśiyaneñ NATOğa quşıluı, F-16 xärbi oçqıçlar mäs’äläse häm saqlanu sänägäte ölkäsendä xezmättäşlek mäs’äläläre dä qaraldı.

İzrail-Fälästin kiyerenkelege dä bäyälängän söyläşüdä Xakan Fidan Ğazzä häm Yordannıñ könbatış üzänlegendäge wazğıyät’neñ könnän-kön naçarayuına iğtibarnı cälep itte.

Törek ministrı höcümnärneñ tuqtawı öçen AQŞnı İzrail östendäge yoğıntısın qullanırğa çaqırdı häm daimi tınıçlıqnı maqsat itüçe säyäsi barışnıñ başlatıluı öçen İzrail belän söyläşülär alıp baru zarurlığın assızıqladı.