Türkiyä BMOda ölgeneñ qabul itelüennän qanäğät

Türkiyä Tışqı êşlär ministrlığı BMO Ğomum şurasınıñ izge kitaplarğa qarşı härtörle ğamälneñ xalıqara xoquqnıñ bozıluı bularaq bäyäläwçe qararı turında yazmaça belderü bastırdı.

Belderüdä:

"BMO Ğomum şurasınıñ 2023nçe yılnıñ 25nçe iyül’ könne izge kitaplarğa qarşı härtörle qırıslıq ğamäleneñ xalıqara xoquqnı bozu bularaq bäyälänelüçe, ilebezneñ dä urtaq täq’dim itüçese bulğan qararnı qabul itüen qanäğätlelek belän qarşılıybız”, - dip äytelde.

Qararnıñ soñğı waqıtlarda Şveśiyada, Daniyada häm Niderlandta poliśiya sağı astında Qor’än-ı Kärimne yandıru ğamällärenä röxsät birelüe arqasında ähämiyätkä iyä buluı citkerelgän belderüdä: "Milliardlağan möselmannı räncetüçe mondıy näfrät cinayätlärenä qarşı xalıqara cämäğätçelekneñ täwäkkällek belän urtaq xäräkät itüe bik möhim”, - dip iskärtelep uzıldı.

Belderüdä Türkiyäneñ İslam doşmanlığı belän köräştä üz cawaplılıqların ütärgä däwam itäçägenä basım yasaldı.

BMO Ğomum şurasında izge kitaplarğa qarşı qırıslıqnı xalıqara xoquqnı bozu bularaq tanuçı häm mondıy ğamällärne kisken räweştä gäyıpläwçe qarar ölgese 25nçe iyül’dä qabul itelgän ide.