Ärdoğan Qorban ğayıte belän qotladı

Türkiyä ilbaşı Räcäp Tayyip Ärdoğan Qorban ğayıte uñayınnan videoyullama yasadı. Ul watandaşlarnı älege dini bäyräm belän çın küñeldän täbrik itte, anıñ törek milläte, İslam dönyası häm barlıq keşelärgä xäyırle buluın teläde.

Ärdoğan bäyrämnärneñ millätneñ berdämlege, berlege, mäñgelek qardäşlegen xäterlätüçe möbaräk könnär buluın assızıqlıy.

“Qorban ğayıte, bigräk tä, qorban ğıybadäte belän urtaqlaşu häm teläktäşlek iñ yuğarı noqtasına citkän bäräkätle waqıt. 6nçı fevral’däge cir teträwlär arqasında yöräklärebez sızlağan bu aylarda Qorban ğayıte watandaşlarıbız arasında tuğandaşlıq moxiten, inşallah, tağın da köçäytäçägenä ışanam”- dide ilbaşı.

Ärdoğan yaralarnı bäyläw, cir teträwdän zıyan kürüçelärgä tiz arada yaña öylären tapşıru öçen êşçänleklärneñ tuqtawsız däwam itüen belderep bolay dide: “Toraqlarnıñ berençe öleşen tapşıruğa, inşallah, oktyabr’-noyabr’ aylarında başlıybız. Millätemä süz birgän şikelle cir teträwdän zıyan kürüçelärgä 319 meñe ber yıl êçendä, tulayım 650 meñ toraqnı tögälläw öçen qararıbız nıq”.