İlbaşı Ärdoğan cirteträw töbägendä awız açtı

Türkiyä İlbaşı Räcäp Tayyip Ärdoğan bıyılğı berençe iftar aşın 6nçı fevral’da barlıqqa kilgän cirteträwlärneñ êpiśentrı Kahramanmaraştağı Qaracasu konteyner şähärçegendä şähitlärneñ tuğannarı, gazıy häm cirteträwdän zıyan kürgän ğailälär belän bergä ütkärde.

Ärdoğan biredä yasağan çığışında, bıyılğı uraza ayınıñ cirteträwlär arqasında ğomerläre özelgännärneñ qayğısı belän moñsu itep qarşılanıluın äytep, cirteträwlärdä häläq buluçılarğa Allahıdan yarlıqaw, tuğannarına sabırlıq häm xäzerge waqıtta däwalanuçı yaralanuçılarğa şifa teläde.

İlbaşı Ärdoğan 14 million watandaşnıñ tormışın tar-mar itkän fäläqät qayda ğına yäşänmäsen berkemneñ dä bitaraf bulu räxätlegeneñ bulmawın belderep: "Cirteträwdän zıyan kürüçelärgä yalğız bulmawların xis itterüebez – alar aldındağı cawaplılığıbıznıñ häm qardäşlek wazıyfabıznıñ zaruriyäte,” – dip äytte.

Çığışında terrorçılıq belän köräşkä dä tuqtalıp uzuçı Ärdoğan: "Soñğı terrorçı ilebez häm millätebez öçen yanaw êlementı buludan çığarılğanğa qadär operaśiyälärebez çiklärebez êçendä häm ar’yağında däwam itäçäk. Bez terrorçılıqnı ciñep kenä qalmıybız. Bu bädbäxetlärgä yärdäm itüçelärneñ, alarnı qoral häm xärbi kiräk-yaraqlar belän täêmin itüçelärneñ pıçraq xisapların da bozaçaqbız,” – dide.