Türkiyädä ğadättän tış xäl iğ’lan itelde

İlbaşı Ärdoğan başqala Änkarada Däwlät mäğ’lümat koordinaśiya üzägendä Kahramanmaraş êpiśentrlı cir teträwlär belän bäyle belderü yasadı.

"Barı tik cömhüriyät tarixıbıznıñ ğına tügel, geografiyabıznıñ häm dönyanıñ iñ zur fälaqätlärennän berse belän oçraştıq,” – dip äytüçe Ärdoğan: "3549 wafatıbız, 22 meñ 168 yaralıbız bar. İñ zur yuanıçıbız: xäzergä qadär 8 meñnän kübräk watandaşıbıznıñ cimerelgän bina qaldıqları astınnan isän kileş çığaruıbız,” – dip belderde.

Ärdoğan: "Töp qanunnıñ (konstituśiyäneñ) 119nçı maddäseneñ bezgä birgän wäqalätkä nigezlänep, ğadättän tış xäl iğ’lan itü qararın qabul ittek. Cir teträw yäşängän 10 vilayätebezne Ğomumi tormışqa täêsir itüçe afat töbäge bularaq iğ’lan itäbez,” – dip äytte.

İlbaşı Ärdoğan xäzergä qadär 54 meñ çatır, 102 meñ karavat häm başqa ixtıyac äyberläreneñ töbäkkä cibärelüen iskärtep uzıp: "Xäzerge waqıtta 53 meñ 317 êzläw-qotqaru wazıyfalıbız belän yärdäm personalı cimerelgän binalar töbägendä êşli. İldän häm çit illärdän törkemnär belän bu san här säğät arta,” – dide.

Ärdoğan: "Jandarmeriyäbez meñnärçä belgeç personal belän bergä 26 yök oçqıçı belän, Yar buyı iminlek komandalığıbız köymäläre belän afät töbägendä wazıyfa başında. Töbäkkä ber meñgä yaqın aşığıç yärdäm maşinası, 241 UMKE (Milli mediśina qotqaru törkeme) häm 2 aşığıç yärdäm oçqıçında wazıyfalı 5 meñ sälamätlek saqlawçı personal cibärelde,” – dip bilgeläp uzdı.

Däwlät başlığı, xäzergä qadär 70 ayırım ildän häm 14 xalıqara oyışmadan yärdäm täq’dimen aluların da citkerep: "Bezgä şaltıratqan 18 däwlät häm xökümät başlığı belän söyläştek. İlebezneñ şuşı awır könendä yärdäm yaqlawın häm täq’dimen citkerü öçen bezgä şaltıratqan, xat-yullama cibärgän, açıqlaw-belderü yasağan böten duslarıbızğa, barlıq däwlät häm xökümät başlıqlarına räxmät belderäm,” – dip äytte.